Uqophe umlando ephula irekhodi
UMGIJIMI wakuleli wamabanga amafushane osemncane, uClarence Munyai, uqophe umlando ku-CAA African Junior Championship ephula irekhodi ebeselime iminyaka ku-200m.
UMunyai (19) ungene phambili ngo-20:22 ku-200m okuyisikhathi esisheshayo kunalesi esabekwa u-Ibrahim Meite esingu-22:76 waseIvory Coast kule midlalo eminyakeni ewu-22 edlule.
Impumelelo kaMunyai isho ukuthi iNingizimu Afrika igcine ibuye nezindondo eziwu-17 emidlalweni ebiseTlemcen, e-Algeria, esongwe ngempelasonto.
INingizimu Afrika ithole amagolide awu-12, amasiliva amane nendondo yethusi eyodwa.
INingizimu Afrika iqede endaweni yesibili ohlwini lwezindondo ngemuva kweEthiopia ethathe eziwu-38.
Abanye abadlali abenze kahle uWerner Dames noHernu van Vuuren abathole indawo yokuqala neyesibili kwi-Discus.
UMpho Tladi uthole igolide ku-110m Hurdles eshaya isikhathi esingu-13:78.
Umengameli we-Athletics South Africa, u-Aleck Skhosana, ubashayele ihlombe abagijimi abasebancane.
“Siyaziqhenya kakhulu ngeqembu lethu lamajuniya. Lisebenze ngokuzikhandla ukuze libuye nalezi zindondo ekhaya. Bafike laphaya benza konke ukubeka iNingizimu Afrika phambili. Lokhu kuzimisela silokhu sikubone njalo kubagijimi bethu. Sihlezi sibheke ukuba sendaweni yokuqala kodwa nalona wumsebenzi omuhle. Sihalalisela abadlali, abaqeqeshi, izimenenja nabo bonke abebesethimbeni elilethe le mpumemelo,” kusho uSkhosana.