Lithwelwe ngeqoma iqembu laseKZN
LITHWELWE ngeqoma ukuthi lingase liwudle umhlanganiso iqembu elizomela iKwa-Zulu-Natal (KZN) emidlalweni kazwelonke yeSminorf 1818 Raga Bolo ezoba se-The Cricket Oval, eGoli, ngoMgqibelo.
IKZN izomelwa yiCibane Eating House and T Two K Tavern yaseMlaza okuyiyona edle umhlanganiso kulesi sifundazwe.
Ingwazi ye-Orlando Pirates uBennedict “Tso” Vilakazi ithe ihlabeke umxhwele ngezinga elibone eKZN ngesikhathi kade ihambele imidlalo yokuhlunga.
UVilakazi ngelinye lamanxusa eRaga Bolo.
“Ezifundazweni engizihambele ngithathwe yiKZN. Iqophelo beliphezulu kakhulu futhi ngicabanga ukuthi amaqembu amaningi azothwala kanzima uma esebhekene naleli qembu elidle umhlanganiso eKZN. Liphethe abafana abasheshayo futhi baqinile,” kusho uVilakazi.
Iqembu elidle umhlanganiso lizokhala lemuke no-R150 000 bese kuthi elishaywe emdlalweni wamanqamu lihlomule ngo-R50 000.
“Bakhona abadlali kule midlalo. Ngicabanga ukuthi amaqembu akhona abadlali angabathola kulo mqhudelwano. Yize abadlali bexubile ngokweminyaka kodwa bakhona abancane obabonayo ukuthi bangafike bayibambe emaqenjini adlala esigabeni esikhulu,” kusho uVilakazi.
Amaqembu aqhamuka ezifundazweni ezehlukene zakuleli azohlukaniswa ngamaqoqo amabili kulo mqhudelwano ozoqala ngoMgqibelo ngo-10 ekuseni bese uphothulwa ngo-5 ntambama.
U-Aphiwe Faku oyisikhulu esiphezulu kwezokuxhumana kwaRaga Bolo uthe amalungiselelo omqhudelwano ahamba kahle.
“Konke sekumi ngomumo. Sesibheke usuku lwemidlalo. Seneme ngokuthi imidlalo yokuhlunga ihambe kahle yonke futhi asingabazi ukuthi nale yamanqamu izoba yimpumelelo,” kusho uFaku.
Amanye amanxusa omqhudelwano azohambela imidlalo kazwelonke nguThabo Mngomeni, owaduma kuPirates, Sibusiso “Rhee” Zuma, owagqama kuBafana Bafana, nguVilakazi owayengukaputeni wePirates, Pollen Ndlanya owayegijima ku-Orlando Pirates nakuKaizer Chiefs noStanton Fredericks, owayeyitapeta kuChiefs.