Ujabhile behlulwa wukuvikela indebe
UPHOXEKILE behlulwa wukuvikela indebe yeCosafa Castle Cup umdlali wasesiswini weBafana Bafana, uCole Alexander, obefuna ukuzibekisela indawo kumqeqeshi uStuart Baxter.
U-Alexander ungomunye wabadlali abebeqala ukudlubha ijezi leqembu lesizwe obekulindeleke ukuthi bakhombise ukuthi kubafanele ukudlala kwiBafana. Nokho elakuleli lihlulwe yiTanzania ngo 1-0 emdlalweni wama-quarterfinal. Lokhu kusho ukuthi selihlulekile wukuvikela indebe yeCosafa eliyiwine ngaphansi komqeqeshi u-Ephraim “Shakes” Mashaba nyakenye. IBafana izobhekana neBotswana kumasemifinal e-Plate eMoruleng Stadium namuhla ngo-5 ntambama.
“Ngijabhile ngomphumela womdlalo nangendlela esidlale ngayo. Kuningi okuholele ekutheni singaphumeleli. Kodwa sizamile uma ubheka ukuthi siyiqembu elisha, ebeliqala ukudlala ndawonye futhi elithakwe nangabafana abancane,” kusho u-Alexander.
“Kuningi esikufundile nokufanele sikusebenzise emdlalweni olandelayo. Kufanele sigxilise imiqondo yethu sisebenze njengeqembu. Sidinga ukugwema amaphutha esiwenzile.”
Kubadlali abancane obekuthakwe ngabo iqembu leBafana kukhona unozinti uBoalefa Pule, Thendo Mukumela, Innocent Maele, Jamie Webber nabanye.
UBaxter, ozwakalise ukuphoxeka ngomphumela womdlalo, kuyaziwa ukuthi uyazifela ngo-Alexander. Ngesikhathi esapheka iKaizer Chiefs wazama wahluleka encenga izikhulu ukuthi zimthengele yena kuPolokwane City. U-Alexander ube ngomunye wabadlali abasayiniswe nguBaxter kwiSuperSport United. UBaxter uyena osegcine enike u-Alexander ithuba lokudlala kwiBafana Bafana. “Bengifuna ukumdlalela ngakho konke enginakho uBaxter ukuze nangokuzayo angangikhohlwa eqenjini lesizwe. Kuyangijabulisa kakhulu ukumsebenzela njengomqeqeshi. Ngijabule kakhulu ukuthi unginike ithuba lokudlala kwiBafana obekuvele kuyiphupho lami. Okufanele ngikwenze wukuqhubeka nokusebenza kanzima,” kusho u-Alexander.