‘Silindele noma yiliphi iqembu’
Stadium, ePitoli.
ISundowns kungenzeka idlale neZanaco, Wydad Casablanca noma ne-Al Ahly kowama-quarterfinal. La maqembu aboshelwe kuGroup D. IZanaco yaseZambia iqhwakele ngamaphuzu awu-11 ngemuva kwemidlalo emihlanu.
Endaweni yesibili kuhlezi iCasablanca yaseMorocco ngamaphuzu ayisishiyagalolunye kuthi endaweni yesithathu kube yi-Al Ahly yase-Egypt ngamaphuzu ayisishiyagalombili. ICoton Sports yaseCameroon isiphumile ngoba ayikaze inqobe selokhu kuqale isigaba samaqoqo.
Kowokugcina iZanaco izodlala neCasablanca ekhaya ngoMgqibelo. Ngosuku olufanayo i-Al Ahly idlala neCoton Sport ekhaya.
U-Onyango uthe balindele noma yiliphi iqembu kumaquarterfinal eChampions League.
“Seneme ngokubuya namaphuzu amathathu e-Ethiopia. Amaqembu amaningi ayile khona kodwa ahluleka wukubuya namaphuzu. Kithina bekuwumdlalo omqoka. Ngisho iphuzu elilodwa belingeke lisisize ngalutho. Besidinga amaphuzu amathathu. Njengamanje akusekho ezandleni zethu ukuthi siqede endaweni yokuqala. Okusezandleni zethu wukuthi sinqobe umdlalo wokugcina bese siyabona kwenzekani ngemuva kwalokho. Asinawo amandla okuzikhethela ukuthi sifuna ukudlala naliphi iqembu. Noma ngubani esizodlala naye kumaquarterfinal uzofika simlindile,” kusho u-Onyango.
Lo nozinti ugile izimanga ngempelasonto evimba iphenathi ngesikhathi bethela othulini iSaint George ngo 1-0 wegoli likaAnthony Laffor ekuhambeni.
“Besidinga ukuthi singayi ekhefini silandela ngemuva. Ukube ingenile iphenathi bekuzobanzima ukuthi sibuye emdlalweni. Ngicabanga ukuthi ukuyivimba kwami kukhulise ukuzethemba kwethu. Kule sizini iChampions League inzima kakhulu ngoba wonke amaqembu afuna ukuhlula iSundowns. Amaqembu amaningi aseyasazi ukuthi sidlala kanjani. Nokho sizoncenga size sifinyelela kowandulela amanqamu,” kusho u-Onyango.