‘Akulandwe owangaphandle’ umqeqeshi
INGWAZI yamaProteas, uJustin Kemp, ibona sekuyisikhathi sokuthi iCricket South Africa (CSA) ilande umqeqeshi wangaphandle.
Ngenyanga edlule iCSA ikhiphe isikhangiso somsebenzi wokucija amaProteas. Inkontileka kaRussell Domingo opheka iqembu iyaphela ngemuva kwemidlalo emine yama-Test elakuleli elizoyidlala ne-England ekuhambeni.
Umdlalo wokuqala ungoLwesine e-The Lords, e-England. UKemp owayeshwiba aphinde abhethe kumaProteas utshele Isolezwe ukuthi iCSA kumele ilande umuntu wangaphandle.
“Sekuyisikhathi sokuthi siqashe umqeqeshi wangaphandle. Kule minyaka eyedlule sizame abaqeqeshi abaningi bakuleli kodwa imiphumela isafana emiqhudelwaneni emikhulu. Yisikhathi sokuthi silethe umuntu ozofika nomqondo ohlukile. Akumele silande noma ngubani kodwa kumele kube ngumqeqeshi onesipiliyoni ezingeni lomhlaba. Kumele kube ngumuntu oseke wanqoba izicoco phambilini ozokwazi ukusisiza ngamaqhinga okumelana nengcindezi ngezikhathi ezinzima,” kusho uKemp.
Abaqeqeshi okuvela ukuthi bafake izicelo zomsebenzi nguGeoffrey Toyana ocija iBizhub Highveld Lions, Paul Adams, Rob Walters, Graham Ford, Makhaya Ntini, Lance Klusener, Marc Boucher noStephen Fleming waseNew Zealand.
“Umbuzo onzima futhi okunzima ukuwuphendula ukuthi kungani amaProteas ehluleka wukumelana nengcindezi emiqhudelwaneni emikhulu. Nami ngibe yingxenye yeqembu emiqhudelwaneni emikhulu kodwa anginayo impendulo eqondile. Kwesinye isikhathi besithola amaqembu ahlangene futhi esefomini. Kukhona futhi nalapho esizigwaze khona ngowethu. Sidinga ukufinyelela emdlalweni owodwa wamanqamu. Uma sike senzenjalo iyophela indaba yokubizwa ngezehluleki,” kusho uKemp.
Phakathi kwabaqeqeshi asebezanywe yiCSA eminyakeni eyedlule kukhona uMickey Arthur osanda kunqoba i-ICC Champions Trophy neqembu lesizwe lasePakistan, Gary Kirsten odle umhlanganiso kwiNdebe yoMhlaba neqembu lesizwe lase-India ngo2015, Eric Simon noCorrie van Zyl. Bonke bangabaqeqeshi abazalwa eNingizimu Afrika.
“Nokho konke kulele kuCSA ukuthi iqoka bani. Mina bengizolanda umqeqeshi wangaphandle. Yize ngingenalo igama eliqondile kodwa bengizobheka khona,” kusho uKemp.