Indida uSangweni esayina kwiPirates
IPHENDUKE indida indaba yokusayina kukaThamsanqa “General” Sangweni kwi-Orlando Pirates.
Izolo emini iPirates ifake kwiwebsite yayo naku-twitter ukuthi uSangweni usengumdlali wayo ngokugcwele.
Idalule ukuthi uSangweni usesayine inkontileka yeminyaka emithathu ezophela ngo-2020.
Kube sekucashunwa uSangweni ejabulela ukusayina kwiPirates.
“Ngijabule ngokujoyina iqembu. Sengilangazelele ukwenza kahle ngiphinde ngisize iqembu libuyele endaweni okwaziwayo ukuthi liyifanele. Ngifuna ukubonga usihlalo nabalandeli beChippa ngakho konke abengenzele kona, ngalokho ngohlale ngibonga,” kusho uSangweni kwi-website yePirates.
Emasontweni adlule imenenja kaSangweni, u-Ali Tlhoaele, itshele leli phephandaba ukuthi usanda kuvuselela inkontileka yakhe ngeminyaka emithathu kwiChippa.
Ngesikhathi leli phephandaba lithinta umthombo osondelene noSangweni uthukile ukuthi usesayinile.
“USangweni akakasayini kwiPirates. Osihlalo bamaqembu womabili (uSiviwe Mpengesi weChippa noKhoza wePirates) basaxoxa. IPirates ijahe ukumemezela ukuthi isimsayinisile ngoba ifuna amanye amaqembu amfunayo akhohlwe ngaye. Ngikhuluma nawe nje imenenja yakhe okumele ixoxe nePirates ngezimfuno nayo ayazi ithuke ngoba isibona kubhalwe kwi-website yePirates ukuthi umdlali usesayinile,” kusho umthombo ocele ukuthi ungadalulwa.
IPirates ayiqali ukusayinisa umdlali bese kusala imibuzo ngaye. Ngesizini edlule uRiyaad Norodien no-Abbubaker Mobara bamangala kuvela izindaba zokuthi basayine kwiPirates yize begcine bephelele kuyona. UNorodien
waveza ukuthi watshelwa ngomqhafazo ukuthi usengumdlali wePirates. NangoJanuwari kwaba nesiphithiphithi ngesikhathi uMarc van Heerden noJames Okwuosa besayina kwiBucs besuka kwiChippa.
I-United yale yaphetha ukuphawula ngendaba kaSangweni.
UMpengesi uthe ngeke akwazi ukuphawula kwathi uLukhanyo Mzinzi ongomunye wezikhulu zeqembu wathi akuthintwe uLuthando Zibeko wezokuxhumana.
UPeter Kotroulis oyisikhulu esiphezulu ucele ukuthi abuye athintwe ngemuva kwehora lesine kodwa ngemuva kwalokho ubengasatholakali. Ocingweni lwakhe bekuzwakala umyalezo othi akakwazi ukukhuluma umatasa.
“Ngeke sisho lutho ngendaba kaSangweni. Kungani ungiphoqa ukuthi ngiphawule ngoSangweni ekubeni ngisho ukuthi sizokhipha isitatimende uma sesibona ukuthi isikhathi siyavuma? IPirates inendlela eyenza ngayo izinto futhi nathi sineyethu indlela yokwenza izinto. Fonela yona iPirates,” kusho uZibeko.
Ngesikhathi ethintwa yileli phephandaba okokuqala uveze ukuthi akayifundi i-website yePirates futhi usalinde isitatimende esivela kusihlalo.
UTlhoaele ucele ukuthi abuye athintwe kodwa wangabe esatholakala.
UThandi Merafe wezokuxhumana kwiPirates ukuqinisekisile ukuthi uSangweni usengumdlali wePirates.
“Ngeke size sibhale kwi-website ekubeni umdlali singamsayinisile. Njengoba sibhale ukuthi simsayinisile kuchaza kona ukuthi usengowethu,” kusho uMerafe.