UPhat Joe ushiyile e-East Coast Radio
LIGQASHUKILE igoda phakathi komsakazo ozinze eThekwini i-East Coast Radio, noMajota “Phat Joe” Khambule obesesebenze kuwo unyaka.
Izolo i-East Coast Radio ikhiphe isitatimende ichaza ngembangela yokushiya kukaPhat Joe.
Ukungavuselelwa kwenkontileka kaPhat Joe ngenxa yokuba nemisebenzi eminingi yikho okudale ukuthi ashiye.
I-East Coast ithe bavumelene noPhat Joe ukuthi ingavuselelwa inkontileka yakhe.
“Kukhona imisebenzi eminingi engekho eThekwini ayenzayo. UPhat Joe wenze omkhulu umsebenzi ngesikhathi esebenzela i-East Coast Radio engumethuli wohlelo lwantambama kodwa imisebenzi ebimdinga eminingi ibimcindeza,” kusho isitatimende.
Umphathi wezinhlelo kulesi siteshi, uZane Derbyshire, uthe uPhat Joe ungomunye wabethuli bezinhlelo abamhloniphayo emkhakheni kaqedisizungu.
“Ubudlelwane bethu naye busheshe baphela singalindele kodwa siyabona ukuthi ungumuntu omatasa kakhulu ngomsebenzi wakhe omusha awenzayo.
“Ngakolunye uhlangothi uhlelo lwantambama ngolunye lwezihamba phambili esiteshini sethu noludinga umuntu ozogxila futhi azinikele kulo azinze eThekwini,” kusho uZane.
Uthe bamfisela konke okuhle uPhat Joe nasemisebenzini yakhe emisha ezokwethulwa maduzane.
“Uyohlala ewumngani kithi sonke e-East Coast Radio. Umethuli omusha wohlelo lwantambama sizomethula maduzane,” kuchaza uZane.
Imizamo yokuthola uPhat Joe ayiphumelelanga, ucingo lwakhe belukhala lungabanjwa.
UPhat Joe ubesenyamanambana kwabanye abalaleli bomsakazo ngenxa yezinkulumo ohlelweni.
NgoFebhuwari wakhuluma inkulumo eyacasula abaningi ngesikhathi ethi akazizwa kahle futhi uyabona uzokwenza amaphutha ohlelweni ngoba ezizwa njengomuntu othatha kancane, isifo esaziwa ngeDown’s Syndrome.
Lokhu kwacasula abalaleli isiteshi saze sammisa emoyeni isonto lonke.