Igama likaDJ Black Coffee kwabaqokwe kowe-Ibiza
KUBONAKALA sengathi ukusebenza kanzima nokuzimisela kuthela izithelo kuDJ wakuleli, uBlack Coffee. UNkosinathi Maphumulo, odume ngelikaBlack Coffee, usephinde waqokwa emcimbini omkhulu owaziwa nge-Ibiza DJ Awards.
Uqokwe emunxeni weDeep House lapho eqokwe khona noDJ okukhona kubona uDJ Damian Lazarus waseBritain, izinsizwa ezimbili ezingoDJ zaseMelika ezizibiza ngeBedouin noDJ Maya Jane Cole wase-UK.
Umcimbi omkhulu wokuklomelisa abaqokwe kulo mcimbi uzoba se-Ibiza, eSpain. Indawo ozoba kuyo yindawo yokuzijuxuza eyaziwa nge-Hi Ibiza lapho uBlack Coffee aqokwa ukuba nguDJ ozonandisa khona kusukela kuqala ihlobo ngenyanga ephelile. Uzoqhubeka anandise kule ndawo azohlala kuyona kuze kube nguSepthemba.
Lo mcimbi, okuhloswe ngawo ukuhlonipha amagalelo oDJ abehlukene abadumile emhlabeni wonke, sewenziwe iminyaka eminingi njengoba waqala ngo1998. Selokhu waqala usubalwa neminye emikhulu endimeni yomculo futhi ukwehlonishwayo eba minyaka yonke.
Enye injongo yawo wukuhlonipha abasebenze kanzima ukugqamisa umkhakha wokuklwebha amapuleti njengoba kuneminxa engu-9 okuqokwe kuyona abaculi abehlukene. Emikhakheni yomculo ekhona kubalwa oweBass, Big Room House, Deep House, Downtempo & Eclectic, Electronic Live Performer, House, Tech House, Techno & Trance. Eminye imikhakha emithathu ekhona oweBreakthrough, Newcomer ne-International DJ.
Kule minxa yomculo engu-9 ekhona, kukhona izindondo ezingu-12 zalabo asebekhona endimeni yomculo abafana nophrojusa, ingoma ehambe phambili ngalowo nyaka, isitebele esihamba phambili, Ibiza DJ, Ibiza Music Event, Ibiza Night and International Festival, Eco Award nenye indondo ekhethekile yokugubha iminyaka engu-20 kwaqalwa umcimbi.
Umcimbi kulindeleke ukuthi ujabulise abaningi njengoba bengaphezu kuka-21 oDJ kwabangu-120 abaqokiwe okulindeleke ukuthi bahambe nezindondo ngosuku lomcimbi. Abanye oDJ abavelayo ngabaziwayo emhlabeni wonke abadume ngokuklwebha amapuleti nasebake bahlonishwa ngezindondo kulo mcimbi. Ukuvota sekuvuliwe kanti kuzovalwa ngo-Agasti. Ngeminye imininingwane ungavakashela ikhasi elithi djawards.com