IMpumalanga izoqinisa uRamaphosa
UYAQINA umkhankaso wePhini likaMengameli, uMnuz Cyril Ramaphosa, wokuthi alandele uMengameli Jacob Zuma ngemuva kokuvele ukuthi isifundazwe iMpumalanga esiholwa uMnuz David Mabuza, singase simeseke.
UMabuza onguSihlalo we-ANC eMpumalanga uyilungu lePremier League, oNdunankulu be-ANC abahambisana noZuma okubalwa kubo uNdunankulu waseFree State, uMnuz Ace Magashule, noMnuz Supra Mahumapelo waseNorth West. Kusolwa ukuthi uMabuza useyishiyile iPremier League.
Ezinye izithunywa zaseMpumalanga engqungqutheleni yemigomo zithi sezizoqala zikhankasele uRamaphosa uma sezibuyela ekhaya.
Esinye isithunywa sithe iMpumalanga ifuna uMabuza abe yiPhini likaMengameli.
Omunye umthombo uthe uMabuza uke wabizelwa emhlanganweni wozakwabo abenabo kwiPremier League, esolwa ngokuba ngumdayisi.
URamaphosa ubeseMpumalanga ngoMeyi eyokhuluma khona nabafundi emcimbini wokwethweswa kwemiyezane.
Khona futhi ngoMashi ukhulume nabasebenzi embuthanweni wabo. Ukufika kwakhe kwalandela wukufika kukaNgqongqoshe wezokuMbiwa phansi, uMnuz Mosebenzi Zwane, ofike waxoshwa ngabasebenzi lapho kwakulindeleke ukuthi akhulume ngeMining Charter.
Isithunywa saseMpumalanga sithe uZwane waxoshwa ngoba akazange amtshele uMabuza ukuthi uza esifundazweni. “Sizowuqinisa umkhankaso wethu ngemuva kwengqungquthela yemigomo.”
UMabuza ubephakanyiswa yi-ANCYL KwaZuluNatal njengePhini likaDkt Dlamini Zuma.
USihlalo we-ANCYL KwaZulu-Natal, uMnuz Kwazi Mshengu, uthe basamile ekutheni bafuna uMabuza abe yiPhini likaMengameli ngemuva kwengqungquthela kaDisemba.
Usole abomkhankaso kaRamaphosa ngokusabalalisa into engekho.
“Ngikhulumile noNobhala-jikelele wethu (ANCYL) noMengameli bobabili abazi ukuthi lolu daba luvelaphi,” kusho uMshengu.
UMshengu uphikile ukuthi uMabuza unemibono ehlukene neYouth League mayelana nodaba lokuthathwa komhlaba ngaphandle kwesinxephezelo.
Kodwa uMabuza uthe yena akahambisani nokuthathwa komhlaba ngaphandle kwesinxephezelo. UMshengu uthe ukuphawula kukaMabuza sokuthi akazithandi izinhlangothi akumele kuhunyushwe njengokuthi useshiye uDkt Dlamini Zuma waya kuRamaphosa.