Izidumbu zezingane zandawonye ezishe zilele
USIZI belubhalwe ebusweni emndenini wakwaBlose eCongo, eNanda, emuva kokusha kwezingane zakhona ezimbili ezishe zangqonga zilele ngoMsombuluko ebusuku.
Isolezwe likhulume noNksz Fundisiwe Blose ongubabekazi kayise kaSmangele (8) noMlungisi (7) abatholwe beshile.
Uthe akakaze ayibone into ayibonile ngoba ufike izingane sezishonile kanti akazi ukuthi umlilo uqutshulwe yini.
“Ngifike izingane sezithule, ngiphatheke kabi ngoba uSfiso (uyise wezingane) ubezithanda izingane zakhe, bezilala ekamelweni naye nomkakhe ngoba ubengafuni zilale ekamelweni elinomnyango ongaphandle. Kusiphethe kabi ukuthi zishe zashona uSfiso esayolanda unina wazo,” kusho uNksz Blose.
Uthe izingane bekufanele ziyovakashela ukhulu ozala unina wazo kodwa zahlala ngoba uSfiso ubesazozithengela izimpahla zamakhaza kwazise kuyabanda KwaDukuza lapho beziya khona.
“Isiphethe kabi le nto ngoba asazi ukuthi ngumlilo wani lona oshise izingane kanjena. Angikaze ngiyibone into enjena selokhu ngazalwa, izingane bezishe ezingalweni, emlenzeni nasekhanda. Siyasola ukuthi zibulawe wukuhogela intuthu,” kusho uNksz Blose.
Ugogo wezingane, uNkk Dudu Gladys Blose (63), uthe kushe yonke into ekamelweni ebelilele izingane.
Uthe izingane bezilala embhedeni oyisitezi onezipontshi.
UMnuz Phindani Shezi (34) ukufakazele ukuthi uSfiso ubevamisile ukulanda unina wezingane zakhe ngoba ubefuna ahlale ephephile ezigebengwini.
“Izolo amaselula akwaVodacom abenenkinga ngoba besingakwazi ukuxhumana nabantu kusho ukuthi uSfiso ushayele unina wezingane zakhe kwathi uma engamtholi wahamba. Baye baphambana ngoba unina wezingane ungivuse esengibikela ukuthi izingane ziyasha. Ngifike uSma noMlungisi belaliswe ngaphandle, sangena sesifuna omncane oneminyaka emine. Simthole ephila safuna usizo kumakhelwane waphuthunyiswa esibhedlela. Ulashelwe ukuhogela intuthu wadedelwa,” kusho uShezi.
Uthe amaphoyisa afike nabezimo eziphuthumayo bathi uSmangele noMlungisi sebeshonile.
Uveze ukuthi zingakashi izingane ubelokhu ezwa iphunga lento eshayo kwathi uma ephuma wangabona ukuthi kushaphi wabuyela endlini ezitshela ukuthi mhlawumbe kushiswa kwenye indawo.
Awakaziwa amalungiselelo omngcwabo ngoba izolo abazali bezingane bebesematasa begqigqa emakhazeni.