Kuchaza ukuthini ukushintsha kukaMabuza?
KUHLUKENE imibono mayelana nokuthi kuzoba namthelela muni ukuphuma kukaNdunankulu waseMpumalanga, uMnuz David Mabuza, ohlangothini lukaDkt Nkosazana Dlamini Zuma.
UMabuza, ophinde abe nguSihlalo we-ANC eMpumalanga, obekubikwa ukuthi uzoba yiphini likaDkt Dlamini Zuma uma kwenzeka enqoba engqungqutheleni kaDisemba, kuvele ukuthi uba nemihlangano eyimfihlo nabaholi be-ANC eGoli okwaziwa ukuthi beseka uMnuz Cyril Ramaphosa oyimbangi kaDkt Dlamini Zuma.
UMabuza bekwaziwa ukuthi usondelene noMengameli Jacob Zuma nokuthi uyilungu lePremier League.
Umhlaziyi wezepolitiki ozimele, uMnuz Lukhona Mnguni, uxwayise ngokuthi kuseva ukuthi sekungathiwa uMabuza uzongena kuluphi uhlangothi.
“UMabuza ungusopolitiki uyazi ukuthi iMpumalanga yisona sifundazwe se-ANC esibumbene kanti ingeyesithathu ngobukhulu. Kungenzeka ukuthi ufuna ukuba nesisindo kakhulu ngokulindela ukweshelwa, ivoti lakhe uzoliyisa kulowo ozomthembisa izulu nomhlaba,” kusho uMnguni.
Uthe njengoba iKZN ne-Eastern Cape behlukene phakathi iMpumalanga ibumbene iyona ezonquma ukuthi ngubani ozoba ngumengameli we-ANC engqungqutheleni kaDisemba.
Omunye umhlaziyi wezepolitiki, uMnuz Xolani Dube, uthe uma kuyiqiniso ukuthi uMabuza ujoyine uhlangothi lukaRamaphosa, lokhu kuzowulimaza umkhankaso wakhe.
“Uma uMabuza ejoyina uRamaphosa awusezokuba khona umehluko ohlangothini lukaDkt Dlamini Zuma nolukaRamaphosa ngoba uMabuza kwaziwa ukuthi ukhohlakele,” kusho uDube.
UDube uthe kuyena izinombolo eziza noMabuza azisho lutho ohlangothini lukaRamaphosa kunokulahlekelwa yithemba emphakathini.
Omunye umhlaziyi ozimele uMnuz Thabani Khumalo yena ubona kuzowuqinisa umkhankaso kaRamaphosa ukufika kukaMabuza.
“Umuntu ozoba noMabuza ohlangothini lwakhe kuzobe ubambe ufishi omkhulu ngoba ulandelwa ngabantu abaningi kanti uyalalelwa eMpumalanga.”
-