Kukhalwa ngenkohlakalo kuma-medical aid
INKOHLAKALO yokusetshenziswa budedengu kwemishwalense yezempilo (ama-medical aid) idla ephaketheni lamakhasimende.
Lokhu kuvezwe yizinkampani zomshwalense wezempilo ezikhala ngokudlanga kobugebengu bokungasetshenziswa ngendlela kwamamedical aid.
Izinhlaka zezempilo ezizimele zisebenzise imali elinganiselwa ku-R150billion kwezempilo nyakenye. U-10% kuya ku-15% wale mali ukhokhele izinhlelo zezempilo eziwumgunyathi. Kukholakala ukuthi lo mkhakha ulahlekelwa yimali elinganiselwa phakathi kuka-R5billion kuya ku-15billion njalo ngonyaka ngenxa yenkohlakalo.
Inkampani yomshwalense wezempilo iBonitas iveze ukuthi ilahlekelwe yimali elinganiselwa ku-R79million phakathi kukaJanuwari noDisemba 2016 ngenxa yobugebengu wabezempilo okubalwa kubo nodokotela. Kule mali bakwaze ukubuyisa u-R20million kuphela.
UMnuz Gerhard van Emmenis oyisikhulu sakwaBonitas uthe le mali ilingene imali engasetshenziselwa ukuvakashela kudokotela izikhawu ezingu-57 000, ukukhokhela izinhlelo zokuhlinzwa kulabo abanenkinga yamaphaphu nabanenkinya yesibindi. Uthe imikhonyovu igcina iholele ekutheni lungafinyeleli kwabaludinga ngempela usizo lwezempilo.
Inkohlakalo kuba ngeyenziwa ngodokotela lapho befuna imali engaphezu kwaleyo okufanele engabe bayayifuna. Kokunye neziguli zisebenzisa ama-medical aid ukukhokhela izinhlelo okungafanele engabe zikhokhelwa ngayo. Uthe okwamanje i-Eastern Cape yisona sifundazwe abathola kuso isibalo esikhulu sabantu abathinteka enkohlakalweni yokusebenzisa budedengu umshwalense wezempilo. Le nkinga igcina seyithinta namanye amakhasimende angaphansi kwawo. “Inkohlakalo nokungasetshenziswa ngendlela komshwalense wezempilo kungezinye zezinto eziholela ekutheni zimbe eqolo izinhlelo zezempilo. Kukholakala ukuthi ilinganiselwa ku-R22billion imali efakwa emalini yokuletha izinhlelo zezempilo ezikhungweni ezizimele unyaka nonyaka ngenxa yenkohlakalo. Ukulwa nenkohlakalo kungenza umehluko ekuhlinzekweni kwezinhlelo zezempilo,” kusho uVan Emmenis.
Ngokwakhe ukulahlekelwa kwabo kuholela ekutheni kufakwe imali ephakathi kuka-R192 kuya ku-R410 emalini ekhokhwa amakhasimende abo.
UDkt Jonathan Broomberg oyisikhulu esiphezulu sakwaDiscovery Health, uthe ithimba labo labaphenyi liphenya amacala angaphezu kuka-3000 athinta ukusetshenziswa budedengu bomshwalense wezempilo unyaka nonyaka. Uthe inkohlakalo ingezinye zezingqinamba ezidala ukuthi kumbe eqolo ukuhlinzeka izinhlelo zezempilo kuleli.
“Inkohlakalo kwezempilo ithinta wonke umuntu ngoba inomthelela ekutheni kunyuke imali ekhokhelwa i-medical aid nokwenza zimbe eqolo izinhlelo zezempilo. Inkohlakalo eyenziwa kumishwalense yezempilo siyithatha njengecala elibomvu futhi sisebenza kanzima nezinhlaka esibambisene nazo ukulwa nenkohlakalo,” kusho Dkt Broomberg.