Bakhathazekile ngeziguli ezinomdlavuza
ISOUTH African Human Rights Commission (SAHRC) isizwakalise ukukhathazeka ngokuthi kusekhona iziguli ezisalinde ukuthola usizo lokwelashelwa umdlavuza KwaZulu-Natal.
Ikhomishini iveze ukuthi isiwutholile umbiko wokuqala ovela kuNgqongqoshe wezeMpilo KwaZulu-Natal, uDkt Sibongiseni Dhlomo, mayelana nombiko wayo ngezinkinga zokwelashwa komdlavuza. Esitatimendeni esikhishwe yile khomishini kuvele ukuthi uDhlomo uyiphendule ngoLwesihlanu oludlule.
I-SAHRC ithe izowufundisisa umbiko wakhe bese ichaza ngezinyathelo okufanele zithathwe.
Ikhomishini izwakalise ukukhathazeka ngabangalutholi usizo lokushiswa umdlavuza ngokohlelo lwe-radiotherapy.
“Ikhomishini ikhathazekile ngeziguli zazesibhedlela i-Addington nezasesibhedlela Inkosi Albert Luthuli Central (IALC) ezisalinde ukwelashwa ngehlelo lwe-radiotherapy – okukhona kuzo esezilinde izinyanga eziyisikhombisa,” kusho isitatimende seSAHRC.
UNksz Gail Smith okhulumela iSAHRC uthe bazonaba kabanzi ngokuqhubeka kwesonto emuva kokucubungula umbiko walo mnyango ngeminye imininingwane equkethwe ngumbiko abawuthole eMnyangweni wezeMpilo. Kulokhu kubalwa ukulethwa kohlu lwabantu abashone belinde ukuthola usizo nokunye okwakufanele kudalulwe wumnyango.
I-SAHRC isalinde eminye imininingwane ecelwe kuDhlomo nabanethemba lokuthi uzoyiletha ngaphambi kokuthi kushaye uJulayi 28 njengoba kuzobe sekuphele izinsuku ezingu-30 ukhishiwe umbiko ngesimo sokwelashwa kweziguli ezinomdlavuza kulesi sifundazwe.
Umbiko weSAHRC okhishwe ngenyanga edlule uveze ukuthi uMnyango wezeMpilo waba budedengu ngendlela owasingatha ngayo udaba lokuphazamiseka kokwelashwa kweziguli ezinomdlavuza.
Lokhu kulandela ukufa kwemishini yokwelapha umdlavuza eyayibize imali engaphezu kuka-R120million esibhedlela i-Addington nokwaba nezinkinga ngokukhandwa kwayo ngenxa yokungezwani phakathi koMnyango wezeMpilo nenkampani eyayithengwe kuyo iTecmed. Okunye okwenze ingaxazululeki inkinga kube ukunikwa ngokungafanele kwenye inkampani iKZN Oncology ithenda yokuyilungisa. Iziguli ebezidinga ukwelashwa zadluliselwa esibhedlela i-IALC ngenxa yomthamo omkhulu weziguli kwaluleka isikhathi esilindwa yiziguli ukuze zelashwe. Lokhu kuholele ekutheni iDA ibhalele iSAHRC ukuze iphenye ngokwelashwa kweziguli.
Yize kube nengcindezi ebivela ezinhlakeni ezehlukene okubalwa kuzo ezepolitiki zokuthi kuxoshwe uDhlomo, uNdunankulu uMnuz Willies Mchunu uthe akakasiboni isidingo sokwenza lokhu. Yena nethimba lakhe okukhona kulo noNgqongqoshe wezeziMali uNkk Belinda Scott baveze ukuthi uMnyango wezeziMali uzosiza uMnyango wezeMpilo kulungiswe isimo ozithola ukuso. Baveza ukuthi uMnyango wezeziMali uzokwengamela ezinye izinhlelo zoMnyango wezeMpilo okubalwa kuzo ukukhishwa kwamathenda, ukuthengwa kwezinsiza kusebenza nokulungiswa kwazo nokunye.
Izolo, uDhlomo uthe ucela kubambelelwe kwaseke wakusho ngodaba lokwelashwa komdlavuza wathi uzosho uma kukhona okusha.