Luhlale obala uqhekeko ngeyongxiwankulu
INGQUNGQUTHELA yemigomo ye-ANC iphenduke inkundla yempi ekuveze obala ukwehlukana kubalandeli baMengameli Jacob Zuma nabePhini lakhe uMnuz Cyril Ramaphosa.
I-Independent Media isithole ngemithombo yayo ebikumakhomishini amabiili okuguqula izisekelo zezomnotho ukuthi kuqubuke impi yamazwi izikhawu eziningi kula makhomishini.
“Izingxoxo bezincike ekutheni ngobani abangathathwa ngokuthi bayizitha zomzabalazo,” kusho umthombo.
Abalandeli baZuma bebefuna ukuthi indaba yongxiwankulu abamhlophe ibalwe njenge zitha ezinkulu zomzabalazo ngakolunye uhlangothi ezikaRamaphosa zithi akuphenywe wonke umuntu ongungxiwa.
Kwenye yamakhomishini angu-11 abebheka le ndaba yongxiwa abefaka uZuma, owayenguNgqongqoshe wezimali uMnuz Pravin Gordhan, owayenguNdunankulu waKwaZuluNatal uMnuz Senzo Mchunu, imeya yaseKurhuleni uMnuz Mzwandile Masina, uSihlalo waseKZN uMnuz Sihle Zikalala nabanye abaholi.
Elinye ilungu laseKZN elingeke lidalulwe, lithe amalungu abegcwele kula makhomishini ngoba efuna ukubhunga ngalo mbulalazwe wongxiwa.
Lithe kusuke isidumo kwajikijelwana ngamazwi kugxekwa uMnuz Derek Hanekom othe wumbhedo eyokubuyiswa komhlaba ngaphandle kwesinxephezelo.
“Uhhewuliwe uHanekom yilungu lentsha uMnuz Njabulo Nzuza elithe akathathelwe izinyathelo. Kumele kungaphenywa umndeni wakwaGupta kuphela kodwa bonke ongxiwankulu futhi uphenyo luqale eminyakeni edlule,” kusho leli lungu.
UMnuz Joel Netshitenzhe, oyingcithabuchopho ye-ANC, uthe ibhungwe kabanzi indaba yongxiwa kule ngqungquthela.
Uthe ezinye zeziphakamiso eziphumile zizoyiswa emagatsheni kube yiwo azobhunga ngazo bese kuthathwa isinqumo engqungqutheleni yangoDisemba.
“Asikwazi ukubalekela ukuthi abamhlophe basawubusa umnotho wakuleli. Sibheka izinto okumele zishintshwe ngoba indaba yongxiwa yinto ebe seqhulwini kule ngqungquthela.”