‘Eyomhlaba ayifakwe kwezemfundo’
UPHIKO lwentsha lwe-ANC KwaZuluNatal lufuna kuthathwe imali obekuzonxeshezelwa ngayo labo ababuyisa umhlaba ukuthi ithathwe ifakwe kwezemfundo ukuze kuxhaswe imfundo yamahhala emanyuvesi.
Lolu phiko luthi kumele ngabe kade yaba khona le mfundo njengoba i-ANC yanquma ngo-2007 ukuthi abafundi kumele baxhaswe baze baphothule iziqu zokuqala.
USihlalo walolu phiko uMnuz Kwazi Mshengu, uthe ngesinye seziphakamiso abazibeke engqungqutheleni yenqubomgomo eqhubekayo eNasrec eGoli.
Uthe kade yayikhulunywa eyale mfundo kodwa akukho mnyakazo, yingakho bethi akuthathwe le mali kuxhaswe le mfundo.
“Uma inkinga kuyimali akuthathwe imali ebizokhokhelwa labo abanxeshezelwa ngokubuyisa umhlaba ifakwe kwezemfundo. Impela le mali yomhlaba ayifakwe kwezemfundo. Lokho kuzoxazulula izinkinga zemali uhulumeni ahlale ekhala ngazo.”
Uthe ezinye zezifundazwe ziyabeseka kulesi siphakamiso ukuze intsha ingasali ngaphandle.
“Baningi abangakwazi ukuyofunda ngoba abanayo imali. Yingakho sithi akuzanywe ezinye zezindlela zokuthola le mali. Siphakamise nokuthi kufakwe intela kuphethroli kuxhaswe le mfundo. Abanezimoto abakhokhe imali uma befaka uphethroli ukuze kuxhaswe imfundo ngoba yinto esithinta sonke,” kuqhuba uMshengu. Lolu phiko luye kule ngqungquthela luthwele ngeqoma udaba lwale mfundo.
UMengameli Jacob Zuma kulindeleke athole umbiko wekhomishini ebiphenya ngale mfundo njengoba iphothule umsebenzi wayo ngeledlule. Le khomishini ibe nezingcawu ezifundazweni ezahlukene ithatha imibono yezinhlaka ezahlukene ngale mfundo.
Yize inyusiwe imali efakwe esikhwameni esixhasa abafundi iNational Students’ Financial Aid Scheme (NSFAS) kodwa le mali ayenele ukuxhasa bonke abafundi.
Abafundi baze bamasha bacekela phansi nempahla kwamanye amanyuvesi befuna le mfundo.
Uhulumeni waze waphoqeleka ukuthi angayinyusi imali yokufunda kulabo bafundi abazali babo abahola ngaphansi kuka-R600 000 ngonyaka.
UMshengu uthe basamile ekutheni kubuyiswe umhlaba ngaphandle kwesinxephezelo.
Kuthiwa kuphakame umoya kwezinye zezithunywa zakulesi sifundazwe ebezikwikhomishini ebibheka eyomhlaba ngesikhathi abanye abaholi be-ANC bethi abahambisani nokuthi umhlaba ubuyiswe ngaphandle kwesinxephezelo.
Abaholi bentsha kuthiwa baphakamise amaphuzu bethi umhlaba kumele udliwe, abantu abagweve nawo banganxeshezelwa.
Kuzokhumbu-leka ukuthi i-ANC KwaZulu-Natal iye kule ngqungquthela esongwa namhlanje iphethe eyokubuyiswa komhlaba ngaphandle kwesinxephezelo njengoba uhlelo lokuwuthenga luhamba ngolonwabu.