Ubemnene ewumuntu wabantu uBizzah
UKUZITHWALA kubadlali abasuke bedumile yinto evame ukugqama kwabasuke bedlalela amaqembu amakhulu njenge-Orlando Pirates neKaizer Chiefs.
Kodwa uMichael “Monkey Jive - Bizzah” Dlamini (74) odabuka eSobantu, eMgungundlovu, ubungaphika ukuthi ungomunye wabadlali abanomlando onothile, ubemnene ewumuntu wabantu.
Ngaso sonke isikhathi uma uhlangana naye ubumthola ezihlekela, engakufihli ukuthi uyiKhosi For Life. Ibimkhathaza indaba yokuxhugela kweChiefs kwi-Absa Premiership.
Ukudlala kwakhe kwiChiefs akumenzanga wakhohlwa yimvelaphi yakhe.
Lokhu kwakufakazelwa wukuthi eminye imidlalo yeManchester ingagcini ngokudlalelwa eMgungundlovu kodwa aqinisekise ukuthi iyodlalelwa nakwezinye izindawo. Ngikhumbula ngisemncane kufika uDlamini KwaZenzele, eHowick, egabisa ngemiqhino edlisa nangezitayela engenandaba nokuthi uzodlala obhuqwini lapho kuzalwa khona uDavid “Mdavuyadavuza” Masondo wodumo lweSoul Brothers.
Ngendlela ayewashaya ngayo amagoli uDlamini, waveza emngcwabeni kazakwabo uPetros “Ten Ten” Nzimande ukuthi kwake kwaba nesiwombe lapho asizwa khona yijubane ebheke kwa-Ewert “The Lip” Nene eDiepkloof, eSoweto, ethi nyawo zami ngibelethe bela nemimese otsotsi bePirates ababeyishaye ngo 7-3.
Ubengomunye wabadlali abawenzele lukhulu Amakhosi ngesikhathi kusaphethe uNene noChina Ngema ababedabuka KwaZulu-Natal.
Ngisho imenenja yeChiefs, uBobby Motaung, ayikufihli ukuthi uDlamini ubengomunye wabadlali abayibekile induku ebandla. “Labo baba yibona abangikhulisile, bedlala ibhola eliphezulu, bezimisela phezu kokuba bengathengwanga futhi behola imali ekade itholakale emasangweni,” kusho uMotaung emngcwabeni kaPetros “Ten Ten” Nzimande ongenye yezingqalabutho ezifike zayibamba kwezwakala kuBafana basePhefeni.
UBizzah udlale ngesikhathi ibhola lisasakazwa abasakazi abanjengoThetha Masombuka noKoos Radebe ababekuthatha bakubeke ufise ukuba
se-Orlando Stadium. Udlale neMoroka Swallows nePimville United Brothers okwakungamaqembu ayenabadlali ababedlala ibhola eliseqophelweni eliphezulu.
UDlamini owayeseqenjini okwabunjwa ngalo Amakhosi ngama-70’s uficwe wukufa ewenzile umsebenzi omuhle esagijima nosihlalo weKaizer Chiefs, uKaizer “Shintsha Guluva” Motaung kuMakhosi. Ngo-1972 unqobe iLife Cup Final. Kulowo mdlalo banenebula AmaZulu ngo 4-1 kuvimbe uFrederick “The Cat” Mfeka. Enye yezintatheli ezimnkantshubomvu ikusho kwagcwala umlomo ukuthi onozinti abanjengoMfeka, Cyprian “Mahhala” Maimane owayekwiBlack Aces noPatson Banda owayebamba kwasani kwiBucs babazi kahle ukuthi uma sekufike uDlamini konakele.
Ubuye wasungula iSobantu Manchester lapho edlale khona noClyde Xaba noSaba Zondi owayeyisiqongqwane emuva. Abanye abadlali adlale nabo kwiChiefs ayijoyina evela kwiMaritzburg City anqoba nayo iProfessional Federation League oRyder Mofokeng, Johhny “Magwegwe” Mokoena, Jackie “Asinamali” Masike, Mboneni “Shaka” Ngcobo, Banks Setlhodi, Zacharia “Computer” Lamola noRatha Mokgatleng osengelinye lamajaji aseNingizimu Afrika.
USetlhodi naye walimisa ngesihloko emngcwabeni
kaNzimande ukuthi ngeke liphinde libekhona iqembu labadlali abawu-15 eliyofana nelabo ngesikhathi besayibambe noDlamini oseyojoyina amaqhawe anjengoNtsolengoe, Leornard “Waga Waga” Dikwebe noNgcobo.
Indwangu ibibuzwa kule ngwevu eyadlala kwiSA Black XI, ibiyiqhathanzipho yazi ukuthi kubalulekile ukuthi uzinakekele ngisho nasentweni oyidlayo.
Uqeqeshe iDurban Bush Bucks esebenza noLawrence “Big Bear” Ngubane anqobe nayo iJPS Final ngo-1987. Uqeqeshe abadlali abanjengoMlungisi “Professor” Ngubane, Reggie “Yizebekhala” Shelembe, Dave Waterson, Majuba Magwaza, Mark Tovey, Bernard Godwe, Harold Jazzy Queen Legodi noMike “Sporo” Mangena.
Usebenze noqweqwe lomqeqeshi, uClive “The Dog” Barker. KwiChiefs, uke waba yisekela likaPaul Dolezar.
Ngaphandle kokuqeqesha, uDlamini wenze umsebenzi oncomekayo ebona uMoren Samora Khulu owayefunda eMtshezi High, e-Estcourt. USamora, obehlala eMadadeni, wafike waqhulula amagoli kwiChiefs nokwaholela ekutheni abizwe ngoMr Ellis Park.
UDlamini ushukwe yisifo sohlangothi kwaze kwaba uficwa wukufa ngeledlule ekwesinye sezibhedlela eThekwini. Ushiye emhlabeni unkosikazi wakhe uMaShozi odume ngelikaVee (Virginia) nezingane. Hamba kahle qhawe ukulwile ukulwa okuhle.