Kumqoka ukuhlaba ikhefu emsebenzini
KUBALULEKILE ukuhlaba ikhefu emsebenzini nokuya eholidini ngoba ukungaphumuli kungaqeda umfutho kubasebenzi.
Lokhu kushiwo nguNkk Priya Naicker oyi-Advice Manager kwaOld Mutual Personal Finance. E-France sebephasise umthetho wokuthi izinkampani ezinabasebenzi abangaphezu kuka-50 azibe nesikhathi sokuphumuza abasebenzi ngoba kuthiwa abasebenzi bayakhathala ngenxa yokungalihlabi ikhefu.
Kuthiwa kumele noma besesehhovisi banikwe amahora athize okufunda ama-email nokuphendula izingcingo zabo. Ngokombiko weWorld Health Organisation, ukhwantalala luzobe luyisifo sesibili esiyingozi esingadala nokukhubazeka ngo-2020. Ukhwantalala kuthiwa ludalwa wukusebenza kanzima nokushoda kwabasebenzi ezinkampanini.
Lokhu kwenza ukuthi abasebenzayo bagcine bengasitholi isikhathi sokuhlaba ikhefu ngoba becabangela ukuthi kuzoshoda kakhulu emsebenzini. UNkk Naicker uthe ukusebenza kanzima kwenza abasebenzi bangaphumuli, kwenza bagcine behluleka wukusebenza, bagule bese kulimala kakhulu inkampani.
“Izinkampani zibeke izinsuku zokuphumula kubasebenzi ngenxa yokuthi kubalulekile ukuthi zithathwe. Njengoba kukhona izinsuku zekhefu, kumele zisetshenziswe ngoba zenza umsebenzi omkhulu. Kuhle ukuthanda umsebenzi wakho kodwa kumele ukhumbule nokuthi uma uzikhandla kakhulu ungalahlekelwa yimpilo yakho. Uma ungasakwazi ukusebenza ngenxa yokugula, emsebenzini wakho bangaqasha omunye kodwa ngeke sivaleke isikhala emndenini wakho ngoba uyakudinga uphila,” kuchaza uNkk Naicker.
Uthe okudingekayo wukuthi abasebenzi banikeze abaqashi isikhathi esanele sokubazisa uma bezohlaba ikhefu. Lokhu kusiza ngokutheni bakwazi ukuhlela nokuthi bavale izikhala ezingavela uma ungasekho. Ugcizelela ukuthi uma usekhefini kusuke kuyisikhathi sokuphumuza umqondo nomzimba, okungaba yicebo elihle ukungacabangi ngokuthinta umsebenzi.
Nazi izinkinga ezingadalwa wukungaphumuli emsebenzini.
Usengozini yokuphathwa wukhwantalala nokungalali kahle.
Ukuphela komdlandla nokucabanga kancane.
Ukukhohlwa okwenziwa ukucindezeleka komqondo.
Ukuba nenhliziyo encane okungathikameza ozakwenu namakhasimende.
Ukuzela emsebenzini nokugula njalo.