Ngeke bakuxwaye ngejini
NGEKE uswele okokugqoka uma unejini ezimpahleni zakho njengoba ingena kuyo yonke imicimbi.
Selokhu kwathi nhlo alipheli idumela lamajini embonini yemfashini, kuphela kuguqulwa indlela akhiwe ngayo. Ngeminyaka yo-1960 ayedla lubi amajini abambanayo bese eba ngosibhula phansi. La majini asekhona yize esakhiwe ngokwehlukile kunakuqala, asebizwa ngamaBoot Leg.
Ake adlisa namajini amakhulu abizwa abedle ngemibala egqamile, abuye ashabalala. Kukhona nama-stonewash nawo abedlisa kudala, namanje asekhona ezitolo. Muva nje kwabesifazane kungenise amajini abizwa ngama-high waist, anokhalo oluphezulu.
Umsiki wengqephu we-Afrolicious Designs uMamsie Mkhwanazi, ukhiphe amathiphu ngendlela okumele agqokwe ngayo amajini. Uthe ijini enombala ongathi u-navy yiyona okumele wonke umuntu abe nayo.
“Siwabiza ngama-blue denim futhi yiwona angasoze aphume esitayeleni. Uma unale jini ungayigqoka manje kunoma yimuphi umcimbi, uphinde uyigqoke eminyakeni elishumi ezayo. Le nhlobo iyohlala ikhona, ibuye ishintshwe indlela eyakhiwe ngayo,” kusho uMamsie.
Uthe lolu hlobo lwejini ungaligqoka ngisho ehhovisi. Uthe womabili okungawabesilisa nabesifazane, ayagqokelwa nebhantshi nezicathulo zokuswenka. “Kwabesifazane kuba kuhle uyigqoke neshethi elimhlophe noma ibhantshi nezicathulo eziphakeme. Nabo abesilisa bangawagqoka nebhantshi noma namateku,” kusho uMamsie.
Uthe ezinye izinhlobo zamajini okubalwa i-stonewash ne-bootleg, azinalo idumela njenge-blue denim. I-bootleg uthe kuhle uma uyigqoka namabhuthi amafishane.
UMamsie uthe nama-skinny jean akulula aphume esitayeleni kunalokho baveza ezinye izindlela zokuwenza kabusha njengoba sekudume nadabukile.
“Mahle amajini adabukile kodwa kwesinye isikhathi anehaba, okungenza kungabukeki kahle uma sekuvele kakhulu umzimba. Okungcono uma uthanda ijini edabukile, ungayithungela indwangu ewulesi omhlophe ngaphansi ukuze kungaveli kakhulu umzimba. Kukhona nezimbali ezithengwa lapho kudayiswa khona izindwangu, okwazi ukuzinamathisela kwijini. Lokhu kungakwenza uziqhamukele nejini ehlukile kodwa ube sesitayeleni,” kuchaza uMamsie.
Mayelana namajini anokhalo oluphezulu, uthe kubukeka kahle kwabanokhalo oluncane ngoba kundingeka okugqoke ngenhla ukushutheke ngaphakathi kwijini. Uveze nokuthi i-denim ayingenisile kumajini kuphela kodwa sekukhona namabhuthi amade afika emadolweni agqokwa nezigqebhe.