Abafelokazi bayahlukumezeka
MHLELI: Ngibhala ngobuhlungu benhliziyo ngendlela abafelokazi abahlukumezeka ngayo kube kungekho lapho bengaya khona basizakale.
Abafelokazi bahanjelwa abondli babo nabantwana babo bese kuba wukushabalala kwempilo yabo. Bahlushwa ngabantu basemzini abafuna izinto zenzeke ngendlela yabo ekubeni kade bengekho umyeni esaphila.
Uma sekushone indoda kuqala umshikashika wokufaka izicelo zezimali lapho umfelokazi uvele abe yinto engelutho abantu basemahhovisi bemyisa ngapha nangapha. Uma usebenzela uhulumeni umnyango ophethe imali yempesheni yabasebenza kuhulumeni ufike ukunike amafomu iWP1002 umuntu akhethe abantu athanda ukuthi bahlomule emalini yakhe uma eshona. Emaphoyiseni nje uze utshelwe ukuthi ungabhala noma abantu abangaki kube imfihlo yakho.
Abantu abangaphansi kweminyaka ewu-22 abafundayo besondliwa ababencike kumufi kudinga balethe imininingwane yokondliwa kwabo kodwa akwenzeki kanjalo kwabanye abafelokazi abanezingane.
Ifayela liyoduva kuze kuphele iminyaka ushaya ucingo, uma bephendula bathi hamba uyobuza ehhovisi elithize. Lapho kulelo hhovisi uzohamba ngani ungenamali?
Kuqhamuke izingane ezino-26 weminyaka zilungiselwe ekubeni wena mfelokazi wangasizakala, washoniswa le nale. Kwalezi zingane ezizofaka isicelo egameni lomyeni wakho awuzazi wena mfelokazi. Uma uya emahhovisi utshelwa ukuthi lezo zingane zifana nomufi, zinikwe amafomu zagcwalisa kwakhulunywa nabasemzini wena mfelokazi awutshelwanga lutho. Kwesinye isikhali kwabona abasemzini bathi abazazi lezo zingane.
Lapho-ke wena uphenduka isilima, ube mubi udayiswe kulezi zingane. Uma ufuna isiqinisekiso kucace ukuthi usungabulawa lime leli fayela lokufaka isicelo semali.
Kwesinye isikhathi kwalezi zingane usuke engakaze azondle umufi yena lona esezithi nguyise, zithi wayekusaba wena mfelokazi yikho ungazazi, umufi akakutshelanga ngazo esaphila.
Uma sekufika incwadi ithi umuzi uzodayiswa ngenxa yamarates, izingane okungezakho nomufi azisafundi, i-medical aid iyavalwa, wena mfelokazi unoshukela neBP uyayidinga imali.
Izingane zamantombazane zizogcina zizinikele emadodeni amadala azoba ama-blesser, zikhulelwe noma zithole izifo, umfana azidlele iwunga antshontshe aboshwe. Isikhathi sokuzila asikho uhlukumezeka impilo yakho yonke kungekho lapho ozolutholakhona usizo.
Ababhekele ukukhipha izikhipha izimali zabafelokazi ake basize, akuyekwe ukudlala ngabafelokazi. Nomabhalane abayeke ukuthatha izindaba zemindeni kube ngezabo.
Nabantu basemzini ikakhulu labobhuti abadala abangenalutho abahluleka ukusebenza, nosisi asebashada bahlulwa yimizi yabo bafune ukuzoshaya imithetho emizini yabafowabo ake bakuyeke lokho. Ake bayeke ukuhlupha abafelokazi.
Akuphele ukuthi uma sishonelwe abayeni bese sizoba yizinto ezingelutho sidlelwe amafa. Umfelokazi okhathazekile