Iziphakamiso ezizoshubisa kwi-ANC
KUNGASE kuphenduke amatafula kulabo abacabanga ukuthi uma kuwina uhlangothi lwabo engqungqutheleni ye-ANC ngoDisemba bazothola izikhundla njengoba i-ANC iphakamisa ukuthi abaholi bekomiti eliphezulu kuzwelonke, ezifundazweni nasezifundeni bakhethwe ngumphakathi.
Lesi ngesinye seziphakamiso esizoyiswa emagatsheni e-ANC bese kuphuma isinqumo sokugcina engqungqutheleni yale nhlangano ngoDisemba.
UNkk Febe PotgieterGqubule we-ANC, uthe kunesiphakamiso sokuthi laba baholi bakhethwe ngamalungu angaphezu kuka-1million e-ANC.
“Ukuze iphele indaba yokuthi owina ukhetho uzongena nohlangothi lwakhe, amalungu yiwona azovotela labo baholi.
“Into eyenzekayo manje ngukuthi abaholi bakhethwa yizithunywa ezisuke zithamele ingqungquthela okuyizo ezinezwi lokugcina kodwa ngokwesiphakamiso esisha amalungu wonke yiwona azokhetha.”
Uthe ezinye zeziphakamiso ngukuthi kwehliswe isibalo sabaholi esigungwini esiphezulu sikazwelonke sibe phakathi kuka-40 no-60.
“Okwamanje babalelwa ku-80 abasesigungwini sikazwelonke kanti amagatsha azonquma. Esinye seziphakamiso zophiko lwentsha ngukuthi kumele u-40% wabaholi kube abantu abasha,” usho kanje.
Uthe kunesiphakamiso sokuthi kunyuswe isibalo sabaholi abaphezulu abaziwa nge-top 6 kwengezwe ngamaphini amabili omengameli-omunye uzobhekana nezindaba ze-ANC omunye nezinto ezithinta izwe.
“Kunesiphakamiso sokuthi kwengezwe elinye iphini likanobhala babe babili, omunye abhekane nezindaba zokuxhumana omunye nezinto ze-ANC nokuthi kubhekwe ukuthi imigomo yeqembu iyafezwa.”
Uthe amagatsha abhunga nendaba yokuthi labo abangeke bawine abazoba sembangweni ukuthi babe amaphini.
“Isiphakamiso sithi akushintshwe indlela yokuvota kuqale kuvotelwe isikhundla sikaMengameli kuqedwe ngaso bese ohlulwayo akwazi ukungenela esephini.
“Lokhu kuzokwenzeka nakwezinye izikhundla ukuze kuqedwe indaba yezinhlangothi. Lokhu kuzobuyisa uzinzo njengoba kunoqhekeko.”
I-ANC KwaZulu-Natal iphakamise ukuthi labo abazohluleka kumele babe amaphini ukuze kubunjwe inhlangano.
UNkk Potgieter-Gqubule, uthe kuphakanyiswe ukuthi kunikwe amandla ikomiti elibhekele ukuphatha kwiANC ukuthi linikwe amandla okubizela esigcawini labo abasuke besoleka ngezenzo ezidicilela phansi inhlangano.
“Uma kunezinsolo zenkohlakalo lowo osolwayo uyobizelwa kulesi sigcawu aqondiswe ubugwegwe. Leli komiti kuphakanyiswe ukuthi linikwe amandla ukuze likwazi ukubabizela esigcawini abasolwayo liphinde lithathe izinqumo ngabo.”
Uthe lokhu kuzobuyisa isithunzi se-ANC ukuze abantu bangazenzeli umathanda.