Uyozama inhlanhla phesheya
IGILA izimanga intombazanyana yaseShowe esinenqwaba yezicoco zokumodela esiyozama inhlanhla phesheya.
UNandipha Nzoyiya (10) ofunda uGrade 5 eLittle Flower Primary, phakathi noJulayi uzoya komodelela izinkampani okuzothi uma esenhlanhleni athole inkontileka eNew York, e-United States of America.
Unina uNksz Slungile Maphumulo uthe indodakazi yakhe yaqala ineminyaka emihlanu ukungenela umncintiswano yawina.
“Wangenela uMiss Tiny Tots waseShowe waphuma phambili. Ngo-2015 ngamfunela inkampani iTrelique asamodela ngaphansi kwayo namanje,” kusho uNksz Maphumulo.
Kusuka ajoyina inkampani yokumodela uNandipha kuthiwa uzigwazela ibhece emincintiswaneni. Unina uthe ubona ukuthi wafuza yena ngoba naye wayemodela esikoleni. Umchaze njengengane enomfutho futhi engasabi ukubukwa. Uthe uNandipha uyabathanda nabantu njengoba esebenza nenhlangano ezimele yomphakathi iSenzokuhle, esiza izikole. Ubuye avakashele ikhaya labadala ayosiza khona. Ithuba lokuya phesheya livele kuhlungwa kwi-International Arts Talent Showcase lapho bekubhekwa amakhono ezinganeni zakuleli.
“Amajaji amthanda esahamba esiteji amtomula khona. NgoJulayi uzongenela imincintiswano okuhlangene kuyo izinkampani zaphesheya. Izingane ezizokhethwa zizothola inkontileka yokusebenzisana nalezo zinkampani. Uma ethole inkontileka ende, angagcina ehlala khona,” kusho uNksz Maphumulo.
Uthe kulolu hambo kumele bazikhokhele zonke izindleko, udinga noma yiluphi uxhaso. UNandipha uneDiploma in Role Models ayithola eTrelique Models nonyaka nesitifiketi seMost Representative Model neModel of the Moment.
Nonyaka ungenele uMiss Scarlet waphuma isithathu waphinde waphuma phambili kuMiss Elite SA nakuDirectors Choice Winner kuwona lo mncintiswano. Uphethe nesicoco sikaMiss Cansa Day Night Walk asithole ngonyaka odlule kanti waphuma isibili kuMiss Petite Natural Summer Pagents ngoDisemba. Eminye imincintiswano ayingenele wawina kubalwa uMiss Petite Christmas Royalty, Miss Youth Queen KZN, Miss Tourism Zululand.