U-DJ Zinhle ukuphendule ihlaya ukukhuthuzwa iselula
UKWENZE ihlaya ukukhuthuzwa kwakhe kuthathwe iselula ngumlandeli obecele ukushutha naye ngempelasonto uZinhle “DJ Zinhle” Jiyane (osesithombeni).
UZinhle ngomunye wosaziwayo abebemenywe emicimbini eyehlukene kwiVodacom Durban July, eThekwini, ngempelasonto.
Ubhale enkundleni kwiTwitter ukuthi ngeSonto ekomunye umcimbi wehlelwe yilesi sehlo.
Ukwenzeka kwaso kubonakale kungamkhathazi ngoba uvele wathi uzothenga enye maduze.
“Izolo ebusuku omunye wabalandeli bami ucele ukushutha nami. Ngivumile ngaze ngamoyizela uma sekuthwetshulwa isithombe kanti lo mgulukudu uyangikhuthuza,” kubhala uZinhle.
Uthe esebheka iselula yakhe ibingasekho.
Uthe iselula uzoyithenga kodwa umkhuthuzi amtshele uma edinga i-charger.
“Ikhona bhuti i-charger bo. Phela ngeke ngisayidinga,” kubhala uZinhle obeze afake izithombe kubonakala ukuthi uyahlekisa ngodaba. Uthe uyazibuza ukuthi umlandeli othathe iselula yakhe ngabe wenzani kuyona manje noma upeqana nezithombe zakhe.
“Into angayenza ngazo manje izithombe zami ukuthi aqhubeke azisebenzise kuselula yakhe entsha.”
Imizamo yokuthola uDJ Zinhle mayelana nodaba ayiphumelelanga. Ucingo lwakhe beluvaliwe lungayemukeli ngisho imiyalezo.
Ezinkundleni zokuxhumana lapho ehlala ematasa khona bekubonakala ukuthi wagcina ngeSonto nangoMsombuluko.
Khonamanjalo kuboshwe abantu abawu-11, emicimbini ehambisana neVodacom Durban July (VDJ) ngoMgqibelo. Baboshwe ngezinsolo zokukhuthuza izicukuthwane. Abathathu baboshwe ebusuku emcimbini iFact Durban Rocks. UCaptain Khephu Ndlovu okhulumela amaphoyisa aseThekwini uthe awu-14 amaselula atholakalile okumele abantu bawalande esiteshini iDurban Central.