UMosimane ubhoboka ngobuhlungu bokuphoxa uTeko Modise
UMQEQESHI weMamelodi Sundowns, uPitso “Jingles” Mosimane, ukhala ezimathonsi ngokuhlukana nomdlali ofana noTeko Modise okuthe ngeledlule iDowns yamemezela ukuthi ngeke ivuselelwe inkontileka yakhe ngemuva kweminyaka engaphezu kweyisithupha ayihlale kuleli qembu likaPatrice Motsepe.
Nakuba ingakacaci indlela ezothathwa uModise (ongafihli ukuthi ushiye kuSundowns ngoba esafuna ukudlala) kodwa uMosimane ukholwa ukuthi noma iliphi iqembu elizomthola lo mdlali oneminyaka engu33 ubudala lizobe lihlabene ngenkalakatha yomdlali.
“Kusemqoka ukuhlonipha izifiso zenye indoda kwesinye isikhathi. Kuke kube nzima njengoba kwenzekile esimeni sikaModise kodwa bekufanele.
“Okungafanele sikukhohlwe wukuthi uModise uyenzeleni iSundowns. Wenze osekuhlule abadlali abaningi emhlabeni.
“Amagalelo akhe awasoze akhohlakala kwiSundowns kanti okunye okube kuhle wukuthi sihlukane kahle ngomoya wesonto.
“Ubesafuna ukudlala uModise futhi usazokwenza lokho kodwa bengingeke ngikwazi ukumthembisa ukuthi ngizomnika lokhu akufunayo.
“Uzokhumbula ukuthi bekuyisimo esifanayo nakuSurprise (Moriri).
“Uhambe eyiqhawe lethu namanje useyilona kodwa futhi lokhu abefuna ukukwenza usakwenza namanje kwiHighlands Park,” kusho uMosimane.
NgokukaMosimane, uModise uyohlale njalo ebalwa nezinkakha zeSundowns nasebholeni laseNingizimu Afrika lonkana.
Ngesizini edlule uModise ubonakale kancane enkundleni okuyikona okuholele ekutheni kuvunyelwane ukuthi inkontileka yakhe ingabe isavuselelwa.
Kusukela efikile kwiSundowns, uModise udle inqwaba yezicoco neqembu.
Ngaphandle kwalokhu lo mdlali useke wadlala izicoco ezinkulu ngayedwana njengokuqokwa njengePSL Footballer of the Season esekwiOrlando Pirates.
“Udlale iFifa Confederations Cup neFifa World Cup okumenza ahluke kubadlali abaningi. Udle izicoco ezimbili zeligi nathi.
Unelungelo lokutshela abazukulu bakhe ukuthi uwine iTelkom Knockout waphinda wadla iNedbank Cup empilweni yakhe. Udle iCaf Champions League neCaf Super Cup okuyizinkomishi abanye abadlali bayoze bangene egodini bengazange baziwine.
UModise uyinkunzi futhi kumfanele ukubizwa kanjalo,” kusho uMosimane.