Angase aphoxeke agaqele oweChiefs
KUSENGENZEKA amaqembu amaningi ePremier Soccer League (PSL) agcine ngokumcuthela kodwa angamtholi umgadli ofakwe yiKaizer Chiefs ohlwini lwabadayiswayo uCamaldine Abraw kwazise kuningi lo mdlali waseTogo okusafanele avumelane ngakho naMakhosi ngaphambi kokuthi kuhlukane inhloko nesixhanti.
U-Abraw ungomunye wabadlali okuthe iChiefs ingabamemezela njengabasohliwini lwabadayiswayo kwavungama inqwaba okuhlanganisa noMark Williams oyinkakha yaleli qembu laseNaturena. Ufunwa uthuli yiBloemfontein Celtic nePolokwane City.
Kuyavela nokuthi maningi amanye amcuthele lo mgadli ofike kwiChiefs ethwelwe ngeqoma kodwa wagcina engazange abonakale enkundleni njengoba bekulindelekile. Njengamanje u-Abraw usemizamweni yokuvumelana neChiefs ngezimali zakhe kwazise ubesasalelwe wunyaka enkontilekeni anayo.
“Namanje angikasiboni isidingo sokudedela u-Abraw ngoba sonke siyamazi futhi akekho ongazi ukuthi ubenenkinga yokulimala. Kungenzeka-ke ukuthi iChiefs imdedela nje yingoba iyazi ukuthi ngeke esalulama? Nakhona ngiyaqagela nje ngoba u-Abraw umgadli omuhle futhi useke wasebenza noSteve (Komphela),” kusho uWilliams.
Uma lo mdlali oxoshwe engazi eseholidini e-Europe ephumelela ukuxoxa neChiefs ukuthi imnike izinto zakhe ngeke aliswele iqembu njengoba iCeltic okwakumele vele aye kuyona ngesikhathi esuka kwiFree State Stars nePolokwane City abakufihli ukuthi bamgaqele. Kusengenzeka futhi ukuthi iChiefs ijike umqondo ngabanye babadlali ebibafake ohlwini lwabadayiswayo ngokusho komthombo weSolezwe.
“Indaba ka-Abraw ithanda ukuba nzima ngoba uma ezohamba iChiefs kumele imkhokhele. Ubengomunye wabahola kakhulu manje unyaka owodwa ungaba imali eningi. Ngeke ngithuke uma kungathiwa iChiefs isijike umqondo ngaye. ICeltic nePolokwane basiqaphe ngelokhozi isimo sakhe kodwa siyezwa futhi ukuthi kukhona amanye amaqembu angafuni ukuziveza kepha alindele ukuthi kucace ukuthi azomthenga kwiChiefs yini lo mgadli noma azomthola ephethe amaphepha amkhululayo,” kusho lo mthombo.
Ngesikhathi echayisa iCeltic ejoyina iChiefs eminyakeni emibili edlule u-Abraw bekulindeleke ukuthi afike abulale izizwe kwiChiefs kodwa lokho kwangenzeka njengoba esededelwa nje. Abanye abadlali abasesimweni esifanayo no-Abraw ngokusho komthombo uLucky Baloyi ovuselele ngeminyaka emibili ngoFebhuwari noSiyanda Xulu yena osasalelwe iminyaka emithathu. IChiefs ngesikhathi imemezela uPhilani Zulu noTeenage Hadebe ngoMsombuluko ikugcizelele ayizikhulumi izindaba zabadlali abahambayo nabahlalayo kodwa izomemezela ku-website uma kukhona izinguquko.