Inselelo kumqeqeshi weRoyal Eagles ezodlala kwi-Engen Knockout
UGABE ngamava abadlali bakhe umqeqeshi weRoyal Eagles, uJustice Mtshali, okufanele aqhamuke neqhinga lokuwina i-Engen U/17 Knockout Challenge ezodlalwa ezinkundleni ezingaphandle kweMoses Mabhida Stadium ngoJulayi 14 kuya ku-16.
I-Eagles, ehlulwe wuMqhele High School waseClermont nyakenye kowamanqamu, ikleliswe kuPool C namaqembu ebukeka izokwazi ukuzidlulela kuwona. Angu-16 amaqembu azogadulisana kwi-Engen, ahlukaniswe izigaba ezine. Iqembu elizodla umhlanganiso lizomela iKwaZuluNatal kokazwelonke iChamp of Champs ezoba seGauteng ngoOkthoba. Elizodla umhlanganiso kowesifundazwe lizothola u-R15 000. I-Engen Knockout yethulwe ngokusemthethweni izolo emcimbini obuhanjelwe ngamaqembu nokaputeni, izikhulu zeSafa eThekwini nabaxhasi.
“Likahle iqoqo esifakwe kulona kodwa kuhlale kunzima ukudlala nabantu ongabazi ekubeni abanye sidlala nabo masonto wonke sibaqonda. Amalungiselelo ahamba kahle kodwa sizoqedela konke kuleli sonto,” kusho uMtshali.
“Ukuhlulwa kowamanqamu kuzoba yisipiliyoni esizofika naso nokuthi iqembu alishintshile. Kukhona abadlali abambalwa esengeze ngabo kodwa iqembu lisafana. Lokho ngicabanga ukuthi kuzosenza sihambe ibanga elide.”
Nakuba kungenzeka ukuthi i-Eagles iziphuzele eqoqweni layo kodwa kulindeleke ukuthi zidlane imilala kuPool B obophele AmaZulu, iBrazil Academy yaKwaNdengezi neNduna Academy yaKwaMashu esikhiqize inqwaba yabadlali abahlonishwayo eNingizimu Afrika.
Umqondsi womqhudelwano, uMpho Dintwa, uthe baqoke ukushintsha unyawo kulokhu ngokumema okaputeni bamaqembu azodlala ukuze bathole umuzwa womqhudelwano ungakaqali.
“Sithathe isinqumo sokuthi kube khona okaputeni ukuze bezwe ukuthi kwenzekani uma kuhlanganiswa i-Engen Knockout baphinde bahlangane namaqembu abazobhekana nawo enkundleni. Nginesiqiniseko sokuthi bazobuyela emaqenjini abo bayogqugquzela ozakwabo,” kusho uDintwa.
UPhumza Ntisana obemele i-Engen uncome igalelo lale nkampani ekuthuthukiseni ibhola kusukela umqhudelwano wasungulwa ngo-2003.