Sithuthwa ngezikorokoro abanikazi bahamba ngobutsetse
MHLELI: Ngicela ukuncoma abanikazi bezithuthi zomphakathi, ikakhulukazi abanikazi bamatekisi abaneqhaza elikhulu ekuqiniseni ezokuphepha komphakathi.
Maningi amatekisi asesimeni esihle nakufanele ukuba semgwaqweni. Ngaleyo ndlela umphakathi uyaphepha. Ngithi qhubekani ngokuthutha umphakathi ngamatekisi aphephile.
Nakuba emaningi amatekisi aphilayo kodwa ngiyakhala ngamanye, ikakhulu oSyaya. Kunezimoto eziguge ngendlela eshaqisayo kodwa ziyasebenza zithutha thina mphakathi ekubeni abanikazi bawo bahamba ngezinhle izimoto lezi.
Kuthini nje kumnikazi wetekisi uma ezokhipha imoto athi ayiyothutha umphakathi ekubeni eyibona ukuthi kayikulungele ukuba semgwaqweni?
Amaphoyisa omgwaqo ayazama ukulwa nalesi sihlava samakhumbi agugile kodwa inkinga wukuthi abashayeli bayaxwayisana uma amaphoyisa evalile, ngaleyo ndlela agcina engaphumeleli ukushanela labo sigedlemba.
Elami lithi, bagibeli masisukume sivikele impilo yethu, sipheze ukugibela izikorokoro ngoba siyazazi futhi sizigibela sizibona ukuthi aziphephile. Sekuyothi lapho kuvela umshophi bese sixabana nomshayeli kanti naye usuke ezama isinkwa sokuphila. Kulolu daba lwamatekisi angekho esimeni, ngicela singabasoli abashayeli ngoba bawashayela nje abathandi. Ukuba kuya ngabo ngabe bonke bashayela amatekisi aphilayo.
Uma singasukuma siwadube wonke la matekisi angekho esimeni, impela abanikazi bawo bangawakhipha emgwaqweni. Ekugcineni yimpilo yethu le elengela engozini. Phansi ngokugibela amatekisi agugile phansi! Mina nje uma ngifika erenki ngiqala ngokubheka itekisi elayishayo, uma ingangigculisi angigibeli.
Uma sonke singawaduba la matekisi, nakanjani angaduva emakhaya. Abanikazi bamatekisi uma benezikhalo bayasukuma babumbane bateleke, pho thina bagibeli singahlulwa yini ukusukuma silwisane namatekisi abeka impilo yethu nemindeni yethu engcupheni? Kumele kuze kufe bani ukuze sizoyibona ingozi esilengele kuyo singabagibeli?
Umhlali okhathazekile