Kuzokwakhiwa amafulethi ngaseBridge City
ZIYAQHUBEKA izinhlelo zokuthuthukisa inxanxathela yezitolo esiza abantu baKwaMashu, Ntuzuma naseNanda iBridge City kwazise kuzoqala uhlelo lokwakhiwa kwezindlu ezibiza kancane maduze nje.
Esitatimendeni esithunyelelwe ngababhekelele ukuthuthukiswa kweBridge City kuvele ukuthi le nxanxathela yezitolo izoba nesibhedlela, amafulethi nemizi abiza kancane namahhovisi ezinkampani ezithile.
Izindlu zizokwakhiwa maduze nje ngabakwaTongaat Hulett bebambisene nomasipala weTheku.
Lokhu kwenziwa ngemhloso yokuqinisekisa ukuthi nabahola kancane bayabhekelelwa.
Amafulethi angu-356 azokwakhiwa yinkampani eyaziwa eNingizimu Afrika jikelele iCalgro M3 kanti azobiza u-R499 000.
Abazothenga amafulethi bazothola uxhaso enkampanini ebolekisa ngemali iChartwell Group.
IChartwell Group neCalgro M3 bathenge umhlaba ngokubambisana kwabakwaTongaat Hulett.
Bathe izindlu namafulethi aseBridge City azoheha abantu abaningi ngoba le ndawo iseduze kweTheku kwazise uma usuka kuyo uza eThekwini kukuthatha isikhathi esincane njengoba ikude ngo-20km enkabeni yeTheku.
IBridge City iseduze kwamalokishi aseNyakathi yeTheku okuyiNtuzuma, KwaMashu, Inanda nePhoenix anabantu abangaphezu kuka-600 000.
Abantu abahlala eBridge City bazoba seduze kwezinto zokuhamba njengoba kuzoba nesitimela namabhasi azosuka eBridge City aye enkabeni yePinetown angaphansi kohlelo lukaMasipala weTheku olubizwa nge-Integrated Rapid Public Transport Network (IRPTN).
UMnuz Brian Ive obhekelele izinhlelo zentuthuko eBridge City kwaTongaat Hulett uthe bayajabula ukuthi kuzokwakhiwa izindlu ezibiza kancane eBridge City.
“Siyajabula ukuthi kuzoba nezindlu ezibiza kancane futhi iBridge City izofana nentuthuko eyenzeka eMhlanga lapho kunezinamahhovisi, imizi ebiza kancane nezitolo. Siyajabula nokuthi ezokuthutha zizoba seduze nabantu baseBridge City ngoba kuzoba namabhasi e-GO! Durban, isitimela kanjalo namatekisi ngeke baswele lutho,” kusho u-Ive.
Izindlu zaseBridge City zizoba namakamelo amabili, indawo yokugezela, ikhishi nendawo yokuphumula.
UMnuz Gregory Connellan onguMqondisi weChartwell Group uthe ukwakhiwa kwezindlu ezibiza kancane kuzohlomulisa abantu abaqalayo ukuthenga imizi futhi abafuna ukuzakhela umnotho kwazise intengo yalezi zindlu izonyuka njalo ngonyaka.