‘UMarawa uxoshelwe ukuphutha’
UKUNGAFIKI kukaRobert Marawa emsebenzini amasonto amabili yikhona okuphoqe iSABC ukuthi imxoshe ohlelweni akade elwenza kuMetro FM ngo-6 kuya ku-7.30.
Lokhu kuvezwe wokhulumela iSABC, uKaizer Kganyago, enkulumeni abe nayo neSolezwe izolo.
UKganyago uthe uMarawa wathatha isinqumo sokungezi emsebenzini ngemuva kokuhamba komdidiyeli wohlelo uBeverly Maphangwa lube lungathinti yena udaba.
“UMarawa kwakungafanele angene odabeni oluphakathi kweSABC noBeverly. Ukungafiki kwakhe emsebenzini kwenza kwanzima ohlelweni. Kuthe uma kubonakala ukuthi akabuyi emsebenzini kwafikwa esinqumeni sokuthi axoshwe,” kusho uKganyago.
Uthe abamtshelanga uMarawa ngokuxoshwa kwakhe emsakazweni kodwa bathumele incwadi kubameli bakhe emazisa ngaloku.
“Ngaphambi kokukhipha isitatimende bese bazi abameli bakhe ngesinqumo esithathiwe. Ngakho alikho icala elithweswe laba bobabili kodwa izinqumo abazithathele bona ngomsebenzi akade bewenza.”
Uthe odabeni lukaBeverly, basamlindile ukuthi abuye kubo kuzoxoxwa ngesenzo sokudlala emoyeni okwakushiwo nguSizwe Mabena weSuperSport.
“UBeverly wabhalelwa incwadi ebuzwa ukuthi yini engadala ukuthi angamiswa emsebenzini ngalokhu akwenzile, namanje impendulo ayikaze itholakale.”
Imizamo yokuthola uMarawa ayiphumelelanga. Ucingo lwakhe beluvaliwe lungemukeli nemiyalezo.
Ubhale enkundleni yokuxhumana uTwitter ukuthi akuphelile ngaye nomsakazo njengoba esazoqhubeka nezinhlelo emsakazweni uma ithuba livela.
“Ngeke ngiphawule kakhulu ngalolu daba ngenxa yokuthi lukubameli bami,” kusho uMarawa.
Ohlelweni lwasekuseni esiteshini iSA FM, olwethulwa uSakina Kamwendo, uMarawa uthe yena nabameli bakhe bakholelwa ukuthi kuzogcina bona enkantolo.
Ukuvezile ukuthi akaze asule emsebenzini.