Usomatekisi usinde edutshulwa ngasekhaya
KWEMBULA kwembeswa esibhedlela kusomatekisi waseNkandla odutshulwe ngentululwane yezinhlamvu ngamadoda angabonwanga eduze kwalapho ehlala khona eMount Royal.
UMnuz Mbongeleni Ndlovu kuthiwa usesimeni esibucayi esibhedlela esingeke sidalulwe ukumvikela emuva kokudutshulwa ngoLwesithathu ntambama eMount Royal, eduze kwasePhoenix.
UNdlovu, onamatekisi ahambela eGoli nakwezinye izindawo ezikude nophinde abe yilungu lekomiti lokuqondisa ubugegwe kusosesheni iDurban Long Distance, udutshulwe esemgwaqweni bude buduze nalapho ehlala khona. Ubesanda kuphuma ekhaya.
Kuthiwa ulimale kanzima, ingalo yakhe yangakwesokudla yiyona elimale kakhulu wase edubuleka nasesifubeni. Kukholakala ukuthi emzimbeni wakhe kungene izinhlamvu eziyisishiyagalolunye. Uphuthunyiswe emtholampilo ngokushesha.
UMnuz Bhekisisa “BK” Nzuza, iphini likasihlalo wekomiti lokuqondisa ubugwegwe kusosesheni iuDurban Long Distance, uthe kubashiye bemangele ukudutshulwa kukaNdlovu.
Uthe selokhu azene naye ubengakaze ahlaselwe. Umchaze njengomuntu olungile nongakaze abe nokuxakazisana namuntu.
“Lena akusiyona into esiyilindele ukuthi isengenzeka kulo mkhakha. Sizizwa sengathi uhulumeni usiyekelelele ngoba ziyaqhubeka izinto ezifana nalezi. Zonke izehlo zobugebengu zenzeka embonini yethu kodwa izigebengu kazibanjwa,” kusho uNzuza.
Okhulumela amaphoyisa KwaZuluNatal, uLt Col Thulani Zwane, uthe amaphoyisa aphenya icala lokuzama ukubulala kodwa bekungakaboshwa muntu.