Uzilengisile obulale udadewabo ngesihluku
USHAQEKILE umndeni wowesilisa waseDumbe okuthiwa ugwaze udadewabo amanxeba ayisikhombisa, wamgwaza esifubeni ngepiki wase ezibulala.
UMnuz Lindokuhle Simelane (24) waseManzimnyama eDumbe kuthiwa ubulale udadewabo, uNksz Thuli Simelane (37), bengazange baxabane. Lesi sehlakalo kuthiwa senzeke ngoLwesithathu emini.
Udadewabo omdala, uNksz Thobile Simelane, uthe uthole ucingo emini ngoLwesithathu ebikelwa ngokwenzekile. Ngokusho kwakhe kukholakala ukuthi umfowabo ubephuma kubo kanina wezingane zakhe ngesikhathi efika ekhaya ebulala udadewabo ngaphandle kwesizathu.
“Ngaphambi kokuthi kwenzeke lokhu ngike ngafonelwa unina wezingane zakhe ethi angitshele uThuli ukuthi akacashe ngoba uNdo uza ekhaya futhi kungenzeka amlimaze. Unina wezingane zakhe ubekhathazekile ngoba uNdo ubesuke kuyena elwa ezama ukumhlasela emsola ngokuqoma. UNdo ufike endlini esecashile uThuli washaya isicabha wasiqeda ngepiki waze wangena. Ngikholwa wukuthi umgwazile ngoba ubenamanxeba ayisikhombisa ekhanda nasesifubeni. Uphinde wamshaya ngepiki esifubeni walishiya emzimbeni wakhe wase eyozilengisa. Namanje sisathukile ngoba bebezwana,” kuchaza uNksz Simelane.
Uthe endlini abulawelwe kuyo udadewabo bekukhona ingane yakhe enenyanga eyodwa. Uthe umfowabo akazange ayilimaze.
Uveze nokuthi umfowabo uke wakhuluma izinto ezingezwakali kahle ezinsukwini ezandulela lesi sehlakalo. Uthe uke wamfonela ethi unina wezingane zakhe usethandana nabanye abantu futhi uvele wayeka umsebenzi oPhongolo ngoba imali abamholela yona incane.
Uthe nyakenye uke wakhombisa ukuphazamiseka emqondweni bamuyisa esibhedlela saseVryheid wabuya ebonakala eseluleme. Uqale manje ukuphinde enze noma akhulume izinto ezikhombisa ukudideka emqondweni.UNksz Simelane uthe abazi nokuthi bazothathani bahlanganise nani njengoba kunguye kuphela osebenzayo.
Imeya yaseDumbe, uMnuz Majuba Mavuso, ithe lesi sehlakalo sibathintile. Ithe bazimisele ngokuwusiza umndeni ukuze ufihle.
“Kusiphatha kabi ukuthi kusaqhubeka ukubulawa kwabesifazane ngesihluku. Okubuhlungu kakhulu wukuthi usisi ushiye nengane enenyanga,” kusho uMavuso.
Okhulumela amaphoyisa uLt Col Thulani Zwane ukuqinisekisile ukuthi amaphoyisa aphenya ngokufa kukaSimelane nodadewabo.