Ingwadla kuphela izinsiza emitholampilo
BAFUNA kungenelele uNgqongqoshe wezeMpilo neMeya yeTheku abantu baseNanda naseRedhill emuva kokubuyiselwa emakhaya ngesikhathi beyohlolwa ushukela.
Abantu abakhulume neSolezwe eNanda kodwa bacele ukungadalulwa amagama abo ngoba besaba ukuthi ngeke baluthole usizo uma beya kule mitholampilo ngokuzayo, baveze ukuthi onesi abanawo ama-gloves agqokwa uma kuxilongwa isiguli noma sithathwa igazi.
Bathi abasakwazi nokuthathwa igazi nokujovwa ngoba izigujana ezigcina igazi uma lidonswa ngenaliti ezibizwa ngama-syringe azikho.
Bathe abakwazi nokuhlolela ushukela ngoba imishini ewuhlolayo ayikho kule mitholampilo.
Imithombo yeSolezwe iveze ukuthi lezi zinto azithengiwe ngenxa yokuthi inkampani egunyazwe wuMnyango wezeMpilo KwaZulu-Natal ukuthi kuthengwe kuyo ayitholakali ocingweni futhi nama-emails ethunyelelwa wona ayiwaphenduli.
Okwamanje bekusalindwe umyalelo ozovela ezikhulwini zoMnyango ukuthi kuthengwe kuziphi izinkampani njengoba lena egunyaziwe ingatholakali.
Ikhansela laseRedhill uMnuz Bobby Maharaj lithe liyitholile imibiko ngokungabikhona kwezinsiza emtholampilo kaMasipala weTheku oseRedhill. Lithe udaba seluludlulisele kwaMasipala.
UMaharaj uthe kumphatha kabi ukuthi abantu abakwazi ukuhlolela ushukela nokuthola imijovo ngoba abanye abanawo amandla okuya kodokotela abazimele.
UNksz Tozi Mthethwa oyiNhloko yoPhiko lwezokuXhumana kuMasipala weTheku uthe wonke umuntu unelungelo lokuthola usizo lwezempilo futhi bayayilungisa indaba yokungabikho kwezinsiza emitholampilo kamasipala.
Uthe uMasipala weTheku unemitholampilo engu-60 kanti engu15 yakhiwe kule minyaka engu-22 edlule ngoba umasipala ufuna bonke abantu abakhele leli dolobha bathole usizo lwezempilo.
“Siyazi ukuthi kunezinsiza ezishodayo emitholampilo yethu. Sesilusukumele udaba. Seziqalile izinhlelo zokuthenga amalancets nama-insulin syringes (okuyizigujana eziphatha imijovo esetshenziswa abanoshukela). Ama-gloves asethengiwe ahanjiswa emitholampilo.
“Obekuqeda ama-gloves wukuthi inkampani esithenga kuyona ibilethe isibalo esincane kodwa sesikulungisile lokho. Izigubhu eziphatha umjovo kashukela zizotholakala emitholampilo kamasipala maduze nje,” kusho uNksz Mthethwa.
Imizamo yokuthola aboMnyango wezeMpilo KwaZulu-Natal ukuba baphawule ayiphumelelanga. Abayiphendulanga imibuzo abathunyelelwe yona.