Usezonikelelwa wunina ngesibindi
SISESIBI isimo sengane (6) yaseClare Estate enenkinga yesibindi yize isimtholile ozoyinikelela ngaso.
Unina kaMalwande Sangweni olokhu aba nenkinga yesibindi kusukela enezinyanga ezimbili, uNksz Nokubonga Sangweni, uthe kungenzeka abe ngcono uma efakelwa isibindi.
UMalwande welashelwa esibhedlela Inkosi Albert Luthuli Central (IALC). Bekulindeleke ukuthi afakelwe isibindi esibhedlela iCharlotte Maxeke, eGauteng kodwa bathole ukuthi kungenzeka kube esinye isibhedlela esizimele esisebenzisana noMnyango wezeMpilo nokho lokhu kusazoqinisekiswa.
NgoNovemba nyakenye, Isolezwe libike ukuthi akakamtholi ozomnikelela nokuthi kusanenkinga ngezinhlelo zokufakelwa kwakhe isibindi esisha.
UNksz Sangweni uthe sekunenhlansi yethemba njengoba imiphumela esanda kuphuma esibhedlela iveze ukuthi uzokwazi ukunikelela indodana yakhe isibindi.
“Imiphumela siyithole ngoMashi kulo nyaka emuva kokuthi sihlolwe ngoFebhuwari. Lokhu kusikhululile ngoba bekunenkinga yokuthi asazi ukuthi angamthola nini umuntu ozomnikelela,” kusho uNksz Sangweni.
Uthe osekusele wukuthi bathole imali yokukhokhela indawo yokuhlala uma eseyofakelwa isibindi eGauteng.
Ngokusho kukaNksz Sangweni noyise kaMalwande, uMnuz Mthembeni Madida, kudingeka bathole imali yokukhokhela indawo yokuhlala okuzohlala kuyo unina nengane uma sekuqediwe ngohlelo lokufakwa kwesibindi.UMadida uthe babikelwe ukuthi kufanele bathole indawo eseduzane nesibhedlela abazohlala kuyona ukuze kube lula ukuthi baye esibhedlela. Lokhu kusho ukuthi kufanele bathole imali elinganiselwa kuR8 000 ngenyanga abazokhokha ngayo irenti, bathenge ukudla baphinde baye ngayo esibhedlela uma bedingeka.
Uthe sebesungule isikhwama osekukhona abanikelile kuso. Isikhwama sesinemali elinganiselwa ku-R11 000 engabasiza inyanga eyodwa.
“Esibhedlela bathe kungenzeka uMalwande nonina bahlale izinyanga eziyisithupha kuya kwezingu-12. Lokhu kwenzelwa ukuthi abe seduzane ukuze kuqashwe isimo sakhe uma esefakelwe isibindi. Sifisa ukuthola abangasisiza ukuze ingane isizakale,” kusho uMadida.