‘Ubesebenza ngokuzikhandla’
USEBENZE ngokuzikhandla eletha uzinzo ebhange likahulumeni waKwaZuluNatal, Ithala, uNkk Yvonne Zwane, kusho uNkk Phumla Ncaphayi, inhloko yoMnyango wezokuThuthukiswa koMnotho, ezokuVakasha neMvelo ebhange.
UNkk Ncaphayi uchaze uNkk Zwane njengomuntu obekhaliphile ukushona kwakhe okuzoshiya igebe elikhulu.
“Ithala yilona elithuthukisa umnotho waKwaZulu-Natal futhi lifaka abantu ababencishwe amathuba kwezomnotho. Ubesebenza ngokuzikhandla. Ngisho esegula akazange ayeke ukusebenza. Uzikhandle kwaze kwaba sekugcineni,” kusho uNkk Ncaphayi.
UDkt Mandla Gantsho obengusihlalo webhodi eThala, uthe balanda uNkk Zwane ngo-2011 ngoba befuna umuntu onobuholi obuqotho futhi ozoshintsha izinto eThala ngesikhathi izinto zazimapeketwane.
UGantsho ubekhuluma enkonzweni yesikhumbuzo kaNkk Zwane ebise-DLI Hall, eGreyville.
“Wafika eThala ngoNovemba 2011 wafika nezinguquko eziningi. Uthole imiklomelo eminingi futhi yonke iminyaka ubehlala ethola umbiko womcwaningi mabhuku ongenagcobho. Namhlanje Ithala lisesimeni esihle futhi lokhu kukhombisa ngokusobala ukuthi ubengumuntu oqotho,” kusho uGantsho.
UMnuz Welcome Dlamini obesebenza noNkk Zwane umchaze njengomholi obeyisibonelo esihle futhi efuna ukuthuthukisa abantu baKwaZulu-Natal.
“Ubethanda ukusebenzela abantu. Ithala belinezinhlelo ezibhekele umphakathi, ezokuwufundisa ngokuphathwa kwemali, ezokuthuthukisa amakhono nezibhekele kakhuku intsha nabesifazane,” kusho uDlamini.
UMnuz Mac Mia osebenze noNkk Zwane iminyaka eyisithupha uthe bekumnandi ukusebenzisana naye ngoba ubenezeluleko ezinhle, engumholi oqotho futhi ehlonipha nomthetho.
“Ushone esikhathini lapho simatasa nezinhlelo zokwenza Ithala libe nazo zonke izinto ezitholakala emabhange amakhulu ukuze likwazi ukuncintisana namanye amabhange. Ithala sifuna ligcine imali kahulumeni lenze yonke into eyenziwa kwamanye amabhange,” kusho uMia.
UNkk Zwane ushone ngoLwesihlanu olwedlule emuva kokugula. Inkonzo yomngcwabo izoba seNyuvesi yaKwaZuluNatal, Edgewood, ngoMgqibelo abese eyofihlwa emathuneni aseLalakahle, eBothas Hill.