Abayingeni eyomfaniswano abahlengikazi
ABAHLENGIKAZI basabisa ngokuya emsebenzini bengawugqokile umfaniswano uma uMnyango wezeMpilo KwaZulu-Natal ungasikhokhi isibonelelo somfaniswano.
Lokhu kulandela ukungakhokhwa kwesibonelelo somfaniswano okufanele ngabe sifakelwe abahlengikazi kusukela ngo-Ephreli kulo nyaka.
Inyunyana yabahlengikazi, iDemocratic Nursing Organisation of Nurses (Denosa) isikhiphe umyalelo emalungwini ayo wokuthi angazihluphi ngokugqoka umfaniswano kusukela ngoMsombuluko ozayo kuze kube bakhokhelwe isibonelelo sawo.
UMnuz Mandla Shabangu, ongumgqugquzeli weDenosa KwaZulu-Natal, uthe bebelokhu besezingxoxweni noMnyango wezeMpilo esifundazweni, yiwona wodwa ongakasikhokhi isibonelelo somfaniswano – zonke ezinye izifundazwe zikwenzile. Uthe yinto osekuvamile ukuthi yenziwe yilo mnyango.
“Sesixoxe nabo izikhathi eziningi sibatshela ukuthi kufanele bafake isibonelelo ngesikhathi kodwa bengakwenzi. NgoFebhuwari kulo nyaka sibatshelile ukuthi uma bengasifaki isibonelelo abalindele ukuthi amalungu ethu ngeke awugqoke umfaniswano. Isibonelelo esinikwa abahlengikazi asenele uma ubuka izinto okufanele bazithenge kodwa kuyaxaka uma umnyango uhluleka ukukhokha yona le mali engenele,” kusho uShabangu.
Uthe kusuka ngoMsombuluko abahlengikazi bazogqoka noma yini abanayo – ngeke bawugqoke umfaniswano ogugile.
UShabangu uthe uhulumeni akufanele abone sengathi ubenzela ufefe abahlengikazi ngokubafakela isibonelelo ikakhulu njengoba singenele ukufeza izidingo zomfaniswano. Uthe babethe uhulumeni akawukhiphe yena umfaniswano kodwa wahluleka - namanje uhluleka ukunika abahlengikazi isibonelelo ngesikhathi ukuze bazithengele.
Kulo nyaka abahlengikazi bakwezinye izifundazwe bafakelwe imali elinganiselwa ku-R2448 yesibonelelo somfaniswano.
UMnuz Claude Naicker wenyunyana yabasebenzi iPublic Servants Association (PSA), uthe bayahambisana nomyalelo wokungagqokwa komfaniswano.
“Sesiyilandele yonke imigudu efanele ukugqugquzela uMnyango wezeMpilo ukuthi ukhokhe lesi sibonelelo kodwa akwenzeki lutho,” kusho uNaicker.
Uthe kubalulekile kubahlengikazi ukuthi banikwe isibonelelo ukuze bezothenga umfaniswano.
UNaicker uthe baxoxisana namalungu abo ukuze bathole ukuthi bathini ngokungagqokwa komfaniswano ngesonto elizayo. Uthe bakholwa ukuthi bazozithola zonke izimpendulo maduzane nokuthi ngesonto elizayo bayobe bengawugqokile.
Kuze kwashaya isikhathi sokushicilela aboMnyango wezeMpilo bengaphenduli.