Bayashayisana ngombono wozohlulwa embangweni we-ANC
KUHLUKENE imibono ngesiphakamiso se-ANC sokuthi iphele indaba yokuthi uhlangothi oluphumelele engqungqutheleni yokukhetha ubuholi lushaqe zonke izikhundla ngenhlosoyokugwema ukuthi kungaphumi elinye iqembu nokuqinisa ubumbano.
Ethula inkulumo yokuvala ingqungquthela yemigomo eNasrec eGoli, uMengameli Jacob Zuma, uthe baphakamisa ukuthi umuntu ozohlulwa esikhundleni sikamengemeli, enziwe iphini.
UZuma uthe indaba yokuthi uhlangothi olunqobile luthatha zonke izikhundla iwubulele umbutho, wengeza ngokuthi sebelahlekelwe ngamaqabane amaningi akhaliphile futhi anamva ngenxa yepolitiki yezinhlangothi.
Lesi siphakamiso siqhamuke neKwaZulu-Natal ehamba noDkt Nkosazana Dlamini Zuma njengoba kuyiwa engqungqutheleni ngoDisemba.
Umhlaziyi wezepolitiki ozimele uMnuz Protas Madlala uthe akangabazi ukuthi lesi siphakamiso sizoyisebenzela i-ANC.
UMadlala uthe isiphakamiso salolu hlobo senziwa kudala KwaZulu-Natal lapho kwakunombango wesikhundla owawushisa phansi phakathi kukaMnuz Sibusiso Ndebele noDkt Zweli Mkhize.
Uthe uMkhize wehlulwa uNdebele amahlandla amabili kwaze kwagcina sekuthiwa kungcono abe yiPhini lakhe ngehloso yokudala ubumbano.
Omunye umhlaziyi wezepolitiki ozimele uMnuz Thabani Khumalo uthe akaboni lesi siphakamiso sizosebenza.
“Ukwehlukana kujule kakhulu kwi-ANC kusuka emagatsheni, ngeke kusize ukuzama ukukuqeda ngokucaze izikhundla,” kusho uKhumalo.
Uthe i-ANC idinga isu elisabalele uma ifuna ukuzivuselela.
Omunye umhlaziyi wezepolitiki uMnuz Xolani Dube uthe akaboni lesi siphakamiso sizosebenza. UDube uthe akukho okubi ngepolitiki yezinhlangothi ngoba iyingxenye yentanto yeningi.
“Into embi ngalesi siphakamiso wukuthi sicindezela abanezinhloso zabo,” kusho uDube.
Uqweqwe lommeli oxoxe neSolezwe esikhumulweni sezindiza eGoli ngoLwesithathu ntambama, obekule ngqungquthela emele i-KZN, uthe lesi siphakamiso sayibumba i-ANC phambilini.
“Lesi siphakamiso sizobumba i-ANC. Sibi isimo kudingeka ibumbane ukuze ingalahlekelwa wukwesekwa,” kusho lo mmeli.