Ufundise abantu ngoNkulunkulu eGhana
NGESIKHATHI ozakwabo bematasa bebheka amanyuvesi abazofunda kuwo uma beqeda umatric, uMnuz Lindani Msomi (21) waseNewlands East wayenza izinhlelo zokuya eGhana ayosebenza nemiphakathi ehlukahlukene yakhona.
UMsomi uphothule umatric ngo-2014 kwathi ngoJulayi 23, 2015 waya eNew-Weja, e-Accra, eGhana, wayofundisa abantu bakhona ngoNkulunkulu.
Engxoxweni ekhethekile neSolezwe uMsomi uveze ukuthi ukhonza esontweni iThe Church of Jesus Christ of Latter Day Saints elidume ngokuthi amaMormon. Kuwumthetho webandla ukuthi abafana bahambe iminyaka emibili badele konke bayosebenza nabantu bakwamanye amazwe.
“Uma sikwelinye izwe sifundisa abantu ngoNkulunkulu, sibafundise ukuthi bangabenza kanjani ngcono ubudlelwano babo noNkulunkulu ngokubatshela lokho akuthandayo nalokho angakuthandi. Esontweni lethu sifundiswa ukuth singabuthinti utshwala nezinye izinto eziletha injabulo yesikhashana. Sifundiswa ukuphila ngendlela eqondile engeke inenge uNkulunkulu,” kusho uMsomi.
Uthe usebenze nabantu baseNew-Weja, Korie-bu, abokufika baseLiberia abahlaliswe esikhungweni esigcina abasuswe yizimpi eBuddumburam, wadlulela e-Ash Town eseKasoa.
Zonke lezi zindawo ziseGhana kanti ezinye zisedolobheni, elokishini nasemakhaya.
Uveze ukuthi njalo ngosuku bebefunda iBhayibheli ihora elilodwa, bafunde nalokho abazokudlulisela kubantu abazobavakashela baphinde bafunde nencwadi yebandla ebizwa nge-Book of Mormon.
Njengoba esebuyile uMsomi uthe uhlela ukuyokwenza iziqu ze-BCom Law, eNyuvesi yaKwaZulu-Natal ukuze abe seduze nonina noyise nezingane zakubo.
Ugqugquzele intsha ukuthi iyeke izidakamizwa nezinye izinto eziyilethela ubumnandi besikhashana kodwa igxile kuNkulunkulu okunguye kuphela oletha injabulo yangempela.
Unina kaMsomi, uNkk Ntombifuthi Msomi, uthe yena nomyeni wakhe, uMnuz Makatshana Msomi, bakhonza e-African Congregational Church kanti amadodana abo amathathu abacela ukuthi bawavumele ayokhonza eChurch of Jesus Christ of Latter Day Saints.
Uthe wayezitshela ukuthi indodana yakhe iyadlala uma ithi ifuna ukuba yi-missionary uma iqeda umatric kodwa ngenxa yokuzimisela ebandleni nezimfundiso ezinhle zalo wabona kungcono ayidedele.
“Ngangikhala ngesikhathi kwenziwa inkonzo yokugcina ngaphambi kokuthi ahambe kodwa ngabona ezinye izingane ezazisho ukuthi zibuya ukuyosebenzela uNkulunkulu kwamanye amazwe ngaxolisa inhliziyo ngazitshela ukuthi uzobuya. Yize sikhonza e-Africa nobaba kodwa amadodana ethu asinankinga nokuthi akhonze ebandleni lawo ngoba ayahlonipha, awaphuzi futhi awazidli izinto ezingawulungele umzimba. Ngisho idrinki ehlohlozelayo asitshela ukuthi ayilungile ekubeni thina besazi ukuthi wutshwala kuphela obungalungile,” kusho uNkk Msomi.