Isidudla siphenduka iciko elingaciki ekamelweni
VUMANI bo! Siyavuma! “Wenzani umayihlome! Wenzani umayihlome, hhayi wethongo lami kanti ufuna ukwenzani! MaSolezwe ngikhuluma nani nje kushubile ngiyagida ngishunqisa impepho esigodlweni sikaVVO Mkhize.
Bakwethu angifuni ukuqamba amanga ngifihle ukuthi ngiphuphuma injabulo uma ngibona indlela azimise ngayo izinkamba zami umntaka Luphuzi. Uma izinkamba zami sezimiswe kahle kanjena nginokujabula emoyeni wami ngoba ekuqaleni ngaxoshwa ngazishiya kabuhlungu.
Okuyikhona esengikufisa emoyeni wami wukuthi uVVO avume ngivakashise intombi yami uMbali esigodlweni.
Le sicelo sokuvakashelwa yintombi esigodlweni angifuni uMkhize asitolike kabi ngoba nami ngiphoqwa yisimo sokuthi ngiyakujabulela ukuba nomuntu wesifazane eduze kwami. Uma ngincishwa ithuba lokuvakashelwa yintombi yami nginovalo lokuthi ngingase ngingene esilingweni sokuthi ngigcine sengishela amathwasa esithwasa nawo.
MaSolezwe ningezwa abantu benikhohlisa bethi idlozi likaVolos liyinto engekho, umakhosi uVVO ulivuselele kabusha kuyimanje liveza imibono eyehlukene.
Ngikhuluma nje ebusuku ithongo lifike langithethisa lathi anginitshele ukuthi umuntu nomuntu kufanele avikele isici somuntu athandana naye.
Idlozi lithi angisho ukuthi umuntu othandana naye ubeke ithemba lakhe kuwena ukuthi uchazele abantu ngesici sakhe ukuthi asisibi ngendlela abantu abasibuka ngayo. Umuntu wesifazane othandana nendoda enomkhaba kufanele achazele abantu ukuthi iyakwazi ukuwukheca ujike ufane nethafa ongathi yinkudla yokudlalela ibhola.
Iqiniso lithi ukube amadoda anemikhaba ebheda ngedlela echazwa ngayo kufanele ngabe awathandani namuntu.
Kungenxa yalesi sizathu ithongo lithi abesifazane abahlekisana namadoda anemikhaba kufanele bahlambuluke basho ukuthi ngaphansi kwentaba enkulu kuhlala inyoka enkulu enemibala yenjabulo.
Idlozi liphinde langidonsa ngendlebe lathi angitshele amadoda athandana nebesifazane abayizidudla ukuthi awakhulume iqiniso asho ukuthi izidudla ziyadudluzana. Kungumsebenzi wamadoda athandana nezidudla ukuthi achaze ukuthi izidudla lezi ungazibuka ucabange ukuthi zingamavila kanti awubuzanga elangeni ngoba zikhuthele zisebenza kuze kukhathale umuntu oqale umsebenzi.
Umuntu ongazi angenza iphutha acabange ukuthi isidudla siqhubeka nobududla nasekamelweni kanti siyajika siphenduke isilenda esiyiciko elingaciki.
Ithongo liphinde lathi ngingalibali ukunxusa amadoda ukuthi achaze THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. ukuthi otakwethu laba okuhlezi kukhulunywa ngabo kuthiwe abafuneki bayimicamelwana ethandekayo emadodeni.
Amadoda niwabona ethule nje ahlezi nemfihlo yokuthi otakwethu bathofozela kamnandi futhi bayasiza nasekuletheni ubuthongo.
Kanjalo nabantu besifazane kufanele bangavumi kuhlekiswe ngamadoda anempandla ngoba bayalazi iqiniso lokuthi kumnandi kanjani ukukhonga ubuthongo ngokuthi uziphululele impandla yendoda yakho.
Idlozi lami liphethe ngokungitshela ukuthi bonke abantu abathandana nezidakwa kufanele bahlambuluke bakhulume iqiniso basho ukuthi izidakwa zabo zidakelwa emqondweni.
Umuntu ongazi angaze adabuke uma ebona umuntu ebekezele ethandana nomuntu ohlala edakiwe kanti yena uyazi ukuthi akadakelwa ekamelweni.
Umuntu ungambuka uthi udakiwe athi uma esefika ekamelweni aphenduke umqemane ojike wedlule ngisho umuntu okuthiwa uziphuzela ubisi nedilinki.