Savelelwa wukugqigqa enkantolo ingasikhokheli imali yesondlo
Buzokwakhe EMELMOTH MHLELI: Ngithanda ukuzwakalisa ukubonga nokugqugquzela ingosi kaMakhoba ephepheni lakho. Imibono yakhe iqinile, iyakha futhi iyasikhuthaza njengesizwe. Indaba yobudoda nokuthi inkunzi isematholeni ingithinte kakhulu.
Ngicela udlulise ukubonga kuMakhoba ngokuzinikela kwakhe ekwakheni nokubuyisana njengesizwe. Themba Mathaba ETHEKWINI MHLELI: Ngicela ukuzwakalisa ukungaphatheki kahle kwami mayelana nesimo sokukhokheleka kwemali yesondlo sabantwana ezinkantolo. Kubuhlungu okwenzeka enkantolo yaseSikhaleni. Imali yenyanga uze uyithole ngenyanga elandelayo. Ufona uze uphelelwe yimali ubuzana nemali yengane. Abayisweli into abazoyishoyo, usuku nosuku banento abavika ngayo.
Ngisho abahola phakathi nenyanga bakhala esifanayo. Kuhola abesibonelelo kuze kuphele izinsuku zokuhola lutho eyesondlo. Indlela labo sisi abasebenza ngayo ayigculisi, sekungathi le mali siyicela kubo, noma yimali kaHulumeni esiyiphiwayo.
Le mali ufike uyilwele kuyise wengane engafuni ukondla ugcine sewuyihambela inkantolo, nakhona futhi uhlangabezane nenkinga yabantu abangafuni ukusebenza ngendlela. Kwathiwa asihole emabhange kodwa kuyafana, nalapho ulinda ukhathale. Uthola ukuthi le mali seyifikela ezikweletini ngoba sinabantwana bayagibela beya ezikoleni. Ugcina sewungena esikweletini utsheleka imali ukuze umntwana aqhubeke nokuya esikoleni. Ngikhuluma ngento esiyenzeke kaningi kumina. Ngigqigqe enkantolo kwaphela izinyanga ezimbili ngifuna ukukhokhelwa. Usuku nosuku bebefika basho izinto ezihlukene. Ngelinye ilanga bakutshela ngemishini engasebenzi, i-network engekho nokunye.
Ngasizwa wukuze ngikhulume nomphathi wakhona. Bebelokhu bekhuluma into eyodwa bethi imali ikhona kodwa balinde i-schedule. Ngathi ngifona ngakusasa bekade bengitshele nge-schedule base bethi bayayigunyaza
Kuningi engingakubala ababekusho ngale nto eyenziwa wosisi bakuleya nkantolo. Abasazi nokuthi siyini. Le mali kusuke kungeyezingane ayidliwa wonina uma kuwukuthi balwa isikhwele sayo.
NgoMeyi yangena ngisuka khona sekuphele amasonto amabili. NgoJuni kwenzeka okufanayo. Ngabonywa nawumphathi wabo ngathola ukusizakala.
Okwangicacela wukuthi le nto bayenza ngamasibomu. Into engayibona ehamba phambili yizindaba qha, bazikhininda behubulaza amatiye.
Mhleli ngiyafisa nokuthola ungqongqoshe obhekelene nokukhokheleka kwemali esuka enkantolo asisize. Le mali isuke iphuma emisebenzini yoyise bezingane zethu. Okwenzeka eSikhaleni nokwabanye, okucikayo bayeyisa nabasebenzi bakhona. Bayakhombisa ukuthi kabanandaba nakhu phela bona kabanangane abayiholela isondlo.
Ngidiniwe khakhulu yisenzo sabaseNkantolo yemantshi eSikhawini, uma labo sisi bengasawudingi umsebenzi abadede kungene abanye. Asikwazi ukuhluphekela imali kanjena, inkampani ibe iyikhokha bese izobambeka enkantolo yabantu abangafuni ukwenza umsebenzi ngendlela efanele.
Nakule nyanga sobe sikhala sona lesi sililo sokugqigqa enkantolo. Sekwanele sidlulwa abesibonelelo, bahlelekile. Sidlala amantombazane ngoba ehleli namakhompyutha.