Umfundisi upepenyeka eThekwini nomkamuntu
UZOTHATHELWA izinyathelo yihhovisi elikhulu lebandla umfundisi waseEastern Cape okusolwa ukuthi upepenyeka eThekwini nowesifazane oshadile obengumsizi wakhe esontweni.
Umfundisi (50), weDivine Empowerment Centre eholwa yi-Apostolic Faith Mission, e-East London, usolwa ngokunyamalala nalo wesifazane okuthiwa usebenza naye.
Umfundisi ubedume ngezeluleko kwabashadile abezethula nomkakhe emsakazweni iLink FM khona e-East London.
Ukunyamalala kwakhe ngoJuni 22 kushaqise ibandla ngenxa yokuthi ubeseshade iminyaka ewu-27.
Kuthiwa unyamalale esanda kuphiwa izipho nemali ebongwa ngokusebenzela ibandla. Ekhasini lakhe likaFacebook kukhombisa ukuthi uyindoda ewukhonzile umndeni ngoba ufake izithombe zomkakhe nendodana, nayo engumfundisi.
Amalungu ebandla akhulume neSolezwe avumile ukuthi ayazi ngalolu daba kodwa anqaba ukunaba. UMfundisi Dyakopu elingatholakalanga igama lakhe, uthe udaba selungaphezu kwabo.
“Lolu daba sesiluyekele ekomitini lebandla kuzwelonke ngoba lungaphezu kwethu. Ngeke ngisho nokuthi ukuphi umfundisi kodwa silinde kuthathwe isinqumo ngaye,” kusho uDyakapu.
Wenqabile ukuphendula eminye imibuzo wathi nenombolo yehhovisi elikhulu yebandla akanayo. Ucingo lwendodana yomfundisi ucingo lubanjwe ngumsizi wayo wathi akukho abazokuphawula ngalolu daba.
Ucingo lukalo wesimame okuthiwa unomfundisi, lubanjwe ngowesilisa oludlulisele kuyena, wenqaba ukusho ukuthi ukuphi.
“Umfundisi (emgagula ngesibongo) akekho kimina. Uma nifuna ukukhuluma naye tshelani oninike inombolo yami ukuthi anixhumanise naye,” kusho lo wesifazane.
Imizamo yokuthola umyeni wakhe ayiphumelelanga, ucingo beluvaliwe. Ephephandabeni lesiNgisi umyeni lo wesifazane ucashunwe ethi ufuna aboshwe umfundisi ngokubaleka nomkakhe.
Imizamo yokuthola umfundisi ayiphumelelanga njengoba inombolo okuthiwa ngeyakhe ibivaliwe.