OweThala uyibekile induku ebandla
SIKHULU isililo ngokudlula emhlabeni kwesikhulu esiphezulu sebhange Ithala uNksz Yvonne Zwane. (osesithombeni). NoMnyango wezokuThuthukiswa koMnotho, ezokuVakasha nokongiwa kweMvelo esifundazweni oholwa wuMnuz Sihle Zikalala udlulise amazwi enduduzo emndenini kaNksz Zwane. Ungubani uNksz Zwane: Amagama akhe aphelele: wuYvonne Nengi Elsie. Wazalwa ngo-Ephreli 27, 1960, eSoweto. Abazali bakhe wuMnuz Obed Zwane noNkk Hilda Zwane. Uqale imfundo yakhe eVuyo Primary School, wadlulela eVukuzenzele Higher Primary. Uqede u-matric eGeorge High School.
Uqale ukusebenza eStandard Bank ngo1984, kwazise ngokuhamba kweminyaka waba sezikhundleni ezihlukene ngenxa yokuba nentshisekelo emsebenzini wakhe.
UNksz Zwane obesegabe ngamava eminyaka engu-27 esebenza ebhange ubeneziqu ze-Bcom Accounting azithola e-University of Zululand, MBL ayithola e-Unisa neDiploma ayithole e-Institute of Bankers South Africa.
Abaningi bazomkhumbula ngesikhathi eqashwa yiThala ngo-2011 ebayisikhulu esiphezulu saleli bhange elidala laKwaZulu-Natal.
Kubikwa ukuthi wafika kuleli bhange izinto zimapeketwane kodwa wafika wasishintsha isimo khona.
Omunye umsebenzi waseThala okhulume nezeMingcwabo, uthe uNksz Zwane impela ubengumholi.
“Abaholi bangempela bakwenza ufise ukwenza njengabo, bayakukhuthaza. Ube wulolo hlobo lomuntu.
Ubezinikele emsebenzini wakhe futhi enobuhlakani. Ube wumuntu wesifazane obenentshisekelo yokuthuthukisa abaningi,’’ kusho umsebenzi ongathandanga negama lakhe.
Ngaphambi kokuthi uNksz Zwane aqashwe yiThala ubeyisikhulu eFirst National Bank.
Kuyena bekufana nobizo ukusebenza ezikhungweni zemali njengoba ake waba yiProvincial Director eFNB ephethe ikomiti lePublic Sector Banking.
Ushiye emhlabeni odadewabo abayisithupha , abashana nesithandwa sakhe.
Inkonzo yakhe yokugcina ise-Edgewood Campus, e-UKZN, kusasa.
Uzofihlwa emathuneni aseLala Kahle.