ISuperSport iqophe umlando ngoWilliams
UMKHUBA weSuperSport United wokudlala eyamanqamu iminyaka ilandelana yikhona okukhuthaze unozinti wokuqina waleli qembu uRonwen Williams ukuthi alule inkontileka yakhe kuMatsatsantsa a Pitori ngeminyaka emihlanu.
UWilliams ofike kuSuperSport esanuka ubisi ngo-2005 uze wakhushulelwa esikimini esikhulu ngesizini ka-2011/2012. Kanti usedlalele leli qembu amahlandla acela ku-200 ekubeni eseneminyaka engu-25 ubudala. Kuyaqala ukuthi iSuperSport inike umdlali inkontileka yeminyaka emihlanu.
Kuze kube imanje uWilliams usedle izicoco ezine okubalwa kuzona amaNedbank Cup amathathu neTelkom Knockout eyodwa. Ngokusho kwakhe lo mdlali ulule inkontileka ngoba enesifiso sokudla isicoco seligi nomqeqeshi wakhe omusha u-Eric Tinkler ongene endaweni kaStuart Baxter osekhuphukele kuBafana Bafana.
“Ngizizwa ngihloniphekile kuSuperSport ngoba inginike ithuba ngingelutho ngineminyaka engu-18 noma 19 ubudala okulandelwe ukuthi ngidlale owamanqamu weNedbank Cup ngineminyaka engu-20. Ngeke futhi ngikuzibe ukuthi eminyakeni emihlanu edlule ngidlale owamanqamu naleli qembu kulandelana. Isipiliyoni esidingekayo kule ligi yethu nginaso futhi nginethemba lokuthi le sizini ezoqala sizobe silwela isicoco seligi. Sizidlile ezinye izicoco manje sekuyisikhathi sokuzama eseligi,” kusho uWilliams.
Mayelana nokusebenza noTinkler uthe: “Sivula ikhasi elisha manje ngoTinkler kodwa nakhona ukuzimisela ngokuqhubeka nomgqigqo wethu wezicoco angikholwa ukuthi kuzoshintsha. Ithemba esinalo ukuthi yize kuzobe kuhlukile ukusebenza ngaphansi kwakhe kunoBaxter kodwa naye uzosisiza asiphushe ukuthi sisebenze nakakhulu emizamweni yethu yokudla isicoco seligi.”
Kusasa i-United izobhekana neCF Mounama koweCaf Confederation Cup. Umdlalo useLucas Moripe Stadium ngo-3 ntambama.
Kumele inqobe bese ithandazela ukuthi kubekhona onqobayo phakathi kweTP Mazembe neHoroya abazobe bedlala ngesikhathi esifanayo. Uma konke kuvuna iqembu likaWilliams bazodlulela kumaquarterfinal.
Engakudingi i-United wukuthi ihlulwe noma iMazembe neHoroya badlale ngokulingana ngo 2-2 noma ngaphezulu.