Umqeqeshi weSundowns uvule isifuba ngothando analo ngeChiefs
UMQEQESHI weMamelodi Sundowns uPitso “Jingles” Mosimane uvule isifuba ngothando lwakhe lweKaizer Chiefs.
NgoLwesithathu ebusuku uMosimane ubesohlelweni lwezemidlalo kuMetro FM lapho ebexoxa khona noMpho Maboi. Lo msakazi ubuze uMosimane ukuthi kungani uma kukhulunywa ngaye lingasali igama leChiefs.
“Ngicabanga ukuthi into eyenza lingasali igama leChiefs uma kukhulunywa ngami yingoba kula masizini amahlanu adlule iligi ibifike inqontshwe yiSundowns bese kuthi ngesizini elandelayo ithathwe yiChiefs. Lo mgqigqo uze waphela ngesizini edlule iBidvest Wits inqoba isicoco seligi. IChiefs yiqembu elidume ngokunqoba izicoco ngakho kumele kuhlonishwe lokho. ISundowns nayo ibuyile mhlawumbe yingakho uma kukhulunywa ngoPitso bese kuvela igama leChiefs. Anginanxa neChiefs. Umqeqeshi wayo uSteve Komphela siyatholana. Empeleni ngikhule ngizifela ngeChiefs ngoba bengiwumlandeli wayo. Ngino-14 no-16 weminyaka bengeseka iChiefs. Nemidlalo yayo bengiyihambela,” kusho uMosimane.
Kumasizini amabili adlule uMosimane usize iSundowns yadla iKaizer Chiefs okokuqala emlandweni wayo emdlalweni wamanqamu. Ngo-2016, iSundowns ithele othulini iChiefs ngo 3-1 kowamanqamu weTelkom Knockout.
“Ngisemncane ngangihlale ngimisa uBra-K (Kaizer Motaung) ePhefeni ngimbuza ngeqembu. Ugogo wami wayehlala ePhefeni ngakaBra-K. Anginayo nencane inkinga neKaizer Chiefs. Bekunesikhathi lapho ngikuthakasela ukubuka imidlalo yayo,” kusho uMosimane.
NgeSonto iSundowns izobhekana ne-AS Vita Club yaseDR Congo emdlalweni kaGroup C weCaf Champions League.
Umdlalo ungo-7 ebusuku eLucas Moripe Stadium. ISundowns ongompetha banyakenye beChampions League isivele idlulele kuma-quarterfinal alo mqhudelwano. Isizolinda ezodlala nayo phakathi kweZenaco, Raja Cassablanca ne-Al Ahly abaku-Group D.
Khonamanjalo izolo ntambama iChiefs idalule ekhasini layo kwiTwitter @KaizerChiefs ukuthi isisayinise uBhongolwethu Jayiya inkontileka yeminyaka emithathu. Lo mdlali ubeyibamba kwiCape Town City ngesizini edlule. Ungumdlali wesithathu ukumenyezelwa Amakhosi ngemuva kukaPhilani Zulu noTeenage Hadebe.