Kuzolwelwa isithunzi kwiSuper Rugby
AKUQONDA kahle okuyikona okumele akwenze amaqembu aseNingizimu Afrika adlala kwiVodacom Super Rugby kwazise imizuliswano emibili yokugcina ngeke isenza mehluko otheni kwabazodlulela kweyomkhumulajezi nakwabazosala bencela izithupha.
Kule mpelasonto kudlalwa umzuliswano owandulela owokugcina kodwa iCell C Sharks ne-Emirates Airlines Lions okuyibona asebevele bazibekisele indawo kweyomkhumulajezi banekhefu. Ukuba sekhefini kwabo kubenza babe nethuba elikahle lokukhiphana amakhizane kowokuvala isizini abazowudlala eGrowth-Point King’s Park, eThekwini ngempelasonto ezayo.
Ngaphandle kwalaba ababili, ikhona imidlalo esho lukhulu emaqenjini akuleli kule mpelasonto. Nakuba ubumqoka bayo bungeke buguqule lutho ngamaqembu azodlulela kweyomkhumulajezi kodwa isithunzi siseqhulwini koweVodacom Bulls neSouthern King’s ePitoli kusasa.
IDHL Stormers imelwe okungaphezulu kwesithunzi ngoba yona nakuba isinayo indawo emzuliswaneni olandelayo kodwa ifomu yayo yakamuva iyayiphoqa ukuthi ilungise amaphutha akamuva ngaphambi kokuqala komshikashika. Kuhle-ke nokho lokhu kumaStormers ngoba abhekene neSunwolves okuyiqembu elikahle uma usemizamweni yokubuyisa ukuzethemba.
Kule mpelasonto azobe esebuyile amaqembu ase-Australia kulandela imidlalo yamaqembu esizwe. Nakhona kodwa iBrumbies kade yalidla iqoqo okwenza imidlalo yanamuhla kuleliya lizwe nakuyona kubangwe isithunzi kuphela njengalapha eNingizimu Afrika.