Abalandeli boSuthu bazokhuza uhebe kweyePremiership
BEKUPHITHIZELA emahhovisi AmaZulu FC asezogijima ku-Absa Premiership ngesizini ezayo izolo ntambama. Imenenja jikelele yoSuthu, uLunga Sokhela ibhale kwi-Twitter ukuthi “We back” kwase kuthi ngaphezulu yafaka ibheji lePremier Soccer League (PSL).
Akuphelanga sikhathi iPSL yakuqinisekisa ukuthi isivumile ukuthi AmaZulu athenge isitifiketi seThanda Royal Zulu sokudlala esigabeni esiphezulu.
Isolezwe alichithanga sikhathi laqonda ngqo emahhovisini oSuthu eMoses Mabhida Stadium, eThekwini.
Lithe lifika lazithela phezu kukaSiyabonga Mbatha, Jabulani Ncobeni noSduduzo Dlamini. Bonke laba badlali sebezogijima kuMaZulu ngesizini ezayo. Ngesizini edlule bebedlala kuThanda. Omunye umdlali osevele useseThekwini kuMaZulu nguMhlengi Cele.
Ngaphandle kwalaba badlali leli phephandaba lithe seliphuma ehhovisi loSuthu lazithela phezu kwesikhulu sakwaJoma okuyinkampani eswenkisa amaqembu ahlukene kuPSL. Inkontileka yoSuthu neKappa iphelile okusho ukuthi kungenzeka lidlale ngeJoma ngesizini ezayo uma izingxoxo ziba yimpumelelo.
USokhela ubevaleleke emhlanganweni kwazise Isolezwe lize lahamba esabambekile. UBrilliant Mkhathini wezokuxhumana kuMaZulu, uthe abazimisele ngokubuyela kuNFD.
“Iqembu libuyele ensimini ngesonto eledlule. Seneme ngokuthi konke kuvunyiwe. Bese sivele sinezinhlelo zokuthi amalungiselelo ethu azohamba kanjani uma iPSL iphasisa indaba yokudayiselana kwethu neThanda. Wonke umuntu eqenjini ujabule. Angingabazi ukuthi nabalandeli beqembu bazokwamukela lokhu. Okuhle wukuthi sesilungiselela kona ukuthi sesidlala esigabeni esikhulu. Ithimba labaqeqeshi ebeliyibambe kuNFD yilona elizoqhubeka kuPSL,” kusho uMkhathini. UJoey Antipas nguyena ololonga iqembu.
Leli phephandaba lihoshe izindaba zokuthi uMenzi Ndwandwe, Njabulo Ngcobo, Zola Jinxa, Zakri Williams noSimphiwe Lumkwana sebeseRichards Bay lapho bezohlolwa khona ngumqeqeshi weRichards Bay FC (obekuyiThanda) uRoger Sikhakhane. Leli qembu lithathe ilungelo loSuthu lokudlala kuNFD.
UMkhathini ebuzwa ukuthi bazosebenzisa yiphi inkundla uthe: “Sihlela ukusebenzisa iKing Zwelithini Stadium eseMlaza nePrincess Magogo Stadium eKwaMashu. Ngesonto elizayo sizodalula yonke into. Kumqoka ukuthi sithole abadlali abanohlonze nokuthi abadlali bazimisele. Sibheke ukwakha isikwati sethu ngabadlali baKwaZuluNatal abanekhono.”
Usuthu aluqali ukuthenga ilungelo leqembu elidlala esigabeni esikhulu. Ngo2005 lwathenga iDynamos. Ngesizini yalo yokuqala libuyele esigabeni esikhulu lazithola livika izembe laqeda endaweni ka-15 okwaphoqa ukuthi liye kodlala kumaPlayOff. Lafike laphumelela liholwa nguJulio Cesar Leal. Ngesizini ka-2007/08 lalivika izembe liqeda endaweni ka-13.
Ngo-2008/09 laqeda endaweni yesishiyagalombili kwathi ngesizini elandelayo layibamba endaweni yesishiyagalolunye. Ngo2010/11 lavika izembe liqeda endaweni ka-14. Usuthu lugcine ukugijima esigabeni esikhulu ngo-2014/15 ligawulwa yizembe njengoba bese luhlale amasizini amabili kuNFD.