Iseyintandokazi kubathengi iToyota Corolla
UMA kukhulunywa ngemoto ethembekile yemindeni kusuke kukhulunywa ngeToyota Corolla. Kungalesi sizathu le moto isalokhu iqhubekile nokuba yintandokazi kubathengi yize yaqala ukwethulwa eminyakeni engaphezulu kwengu-50 eyedlule.
Emhlabeni jikelele sekudayiswe amaCorolla angaphezulu kuka-45 million, kulowo-45 million, angaphezulu kuka-1 million kuleli.
I-Corolla ekhona emakethe njengamanje ngeyesizukulwane sika-11.
Kumele ngibethulele isigqoko kwaToyota ngokuthi njalo bahlale beyithuthukisa ukuze iqhubeke nokuba yintandokazi kubathengi.
Ngithole ithuba lokuhamba ngekadizili, iD-4D.
Engingakutshela khona wukuthi iyawusaba udizili. Uma igcwele ingitshele ukuthi ingahamba ibanga elingaphezulu kuka-794 km ngodizili okhona nokuyibanga elingencane neze.
Emgwaqweni ibiphuza nje amalitha angu-5.6 okusho ukuthi icaphuna kancane nokuyenza yonge ngendlela eyisimanga futhi udizili ungakulonda isikhathi eside.
Injini yayo ingu-1.4 litre enamandla angu66 kW ne-torque ka-205 Nm.
Idonsa ngamagiya ayisithupha aya phambili. KwaToyota bona bathi ngebanga lika-100km/h idla amalitha angu-4.5.
Ungazitshela ukuthi mancane la mandla angu-66 kW uma uwafunda kodwa yifake emgwaqweni uzoyizwa indaba. Iyashesha futhi ijubane ilinyusa ngamandla ngaphandle kokukubangela umsindo omkhulu wenjini ngaphakathi.
Ngaphandle kwenjni yayo eyongayo, iCorolla iyimoto yomndeni ekahle futhi enesithunzi. Ngaphandle ishaya ngamaDaytime running lights angamaLED, 16 inch alloy wheels, nemibala yayo egqamile.
Ngaphakathi abagibeli abahlanu bahlala ngokukhululeka ezihlalweni zayo zesikhumba futhi inebhuthi enkulu, ine-touchscreen/DVD enhle okusengathi yi-tablet evele yanamekwa, iyakutshela ukuthi ngodizili onawo ungahamba ibanga elingakanani, inamawindi kagesi nokunye.
Ngakwezokuphepha iphuma ne-ABS eneBA, EBD futhi inama-airbags omshayeli, umgibeli kanjalo nawasemaceleni.
Ngemuva kokushayela le Corolla ngibonile ukuthi isazoqhubeka nokuba yintandokazi kubathengi njenxa yendlela ebukeka ngayo, ukuba ntofonfoto kwayo, ukuvuleka kwayo kanjalo nobuchwepheshe obuhlanganisa ikhamera yangemuva uma uhlehla. INANI TOYOTA COROLLA 1.4 D Prestige: R307 500 Iphuma neService Plan yeminyaka emihlanu noma ibanga lika-90 000km neyemithathu noma ibanga lika-100 000km.