Kwethulwe iBMW 4 Series esithuthukisiwe
NGISEMSEBENZINI ngizenzela umsebenzi njengenjwayelo. Kuwo lowo mnyama kuvela isimemo sakwaBMW kuleli ukuthi ngithamele ukwethulwa kwe-4 Series entsha eMpumalanga.
Ukube nginguSands - isilomo sakamuva somculi waseSwazini -bengizovele ngicule ingoma ethi Tigi Tigi ngoba nami inhliziyo yami ishintshe indlela eshaya ngayo. Phela igcwele injabulo.
Okungijabulisayo wukuthi ngizobe ngiqala ukushayela i-4 Series futhi ngizobe ngiqala nokuya eNelspruit lapho yethulwa khona.
Isimemo sifika nje, kusasele inqwaba yezinsuku ngaphambi kokuthi kuyiwe kwesikaDavid “DD” Mabuza, undunankulu waseMpumalanga.
Ngoba alukho usuku olungafiki! NgoLwesibili bengikuwo belu umcimbi wokwethulwa kwe-4 Series.
Injabulo ebenginayo ngithola isimemo ayishabalalanga neze ngoba yimoto emnandi futhi nesimo sezulu besivuma kuphole kamnandi.
Empeleni i-4 Series ayiyintsha kodwa kuthuthukiswe esemakethe eyaqala ukwethulwa ngo-2013.
U-Edward Makwana, imenenja yezokuxhumana kwaBMW kuleli, uthe emhlabeni jikelele sebedayise ama-4 Series angaphezulu kuka-400 000. ENingizimu Afrika badayise angaphezulu kuka-5 500.
Uthe babheke ukuthi baqhubeke nempumelelo yale moto njengoba beyithuthukise lapha nalapha.
Umehluko ogqamile omkhulu ngamalambu ayo ngaphambili nangemuva angamaLED.
Okunye okuhlukile ngamarimu angu-18 kuya ku-19 inch atholakala kuphela kwi-4 Series.
Baphinde bethula nemibala emisha oluhlaza okwesibhakabhaka abawubiza ngo-Snapper Rocks Blue nowolintshi obizwa ngoSunset Orange, okuyimibala emihle futhi ewadonsayo amehlo.
Okunye wukuyithuthukisa i-suspension ukuze ikwazi ukubambelela emakhoneni kodwa ingayeki ukuba ntofontofo. Nesiteringi naso basithuthukisile futhi sigcwala isandla uma usibambile nokwenza uzizwe ukuthi uwena oyilawulayo imoto.
Ngesikhathi siyishayela emigwaqeni emnandi yaseMpumalanga emakhoneni bekungathi kukhona umayibuthi oyibamba phansi futhi kuntofontofo ukuhamba ngayo.
Okunye abakwenzile wukuyithuthukisa amabhreki ukuze abambe thaqa ngesikhathi esincane.
Ngokujwayelekile uma kwethulwa izimoto basinikeza eziseqophelweni eliphezulu eziphuma nakho konke kodwa kulokhu benze okuhlukile basinikeza “encane” ama-420d ne-420i. Lokhu bathe bafuna sizwe ukuthi injani ngoba yiyona amakhasimende ayithenga kakhulu.
Engikuqaphelile wukuthi infotonfoto ngaphakathi, ikakhulukazi uma ihamba kuthelawayeka futhi ithule.
Ngaphakathi ishaya ngezihlalo zesikhumba, i-screen esikhombisa inkombandlela futhi i- Multifunctional Instrument Display yayo inhle futhi iveza ngezindlela ezahlukene, kuye ngokuthi umshayeli ukhethe ukuthi imoto ihambe kanjani phakathi njengoComfort, Sport nokunye.
I centre console yakhiwe kusetshenziswa izinto eziseqophelweni eliphezulu. Nakwezobuchwepheshe iphuma nokuningi njengeCruise control, Speed Limiter, wireless charging nokunye.
Le moto ihlukene ngezinhlobo ezintathu okuyiCoupe, Gran Coupe neyisilahlamatende, iConvertible.
IConvertible yona bathe abayishintshanga kakhulu indlela ehamba ngayo ngoba abathengi bayo bathanda ukuhamba ngemoto entofontofo ababhekile ukugijima ngayo.
Uma kuziwa ngakwinjini kukhna ezikaphethroli ezintathu okuyi-420i enamandla angu-135 kW, 430i enamandla angu-185 kW, ne-440i enamandla angu-240 kW.
Kukhona nekadizili engu-420d enamandla angu-140 kW. Yona ayitholakali kwisilahla. AMANANI 4 Series Coupe 420i manual - R603 200 420i auto - R624 400 420d manual - R639 300 420d auto - R660 100 430i manual - R690 300 430i auto - R711 100 440i auto - R861 100 4 Series Gran Coupe 420i manual - R603 200 420i auto - R624 400 420d manual - R639 300 420d auto - R660 100 430i manual - R690 300 430i auto - R711 100 440i auto - R861 100 4 Series Convertible 420i manual - R715 400 420i auto - R736 200 430i manual - R827 600 430i auto - R848 400 440i auto - R985 100