Buza futhi wazi ngekhono likamakhenikha wemoto yakho
SASHO saphakama futhi leso sithunywa esithi mangithathe ishoba lami ngihlonze umhlola ukuthi ungaphi, ngisho ngiqale ngokuthi ngimemezele ukuthi sonke esiwuvumayo lo mhlahlo masishaye esidume ngazo siqoqe ithithibale inkayimane maqede sibe sihlokoloza ama hazard ethu, sibondabonde isitelingi siyigobele eceleni komgwaqo lapho kuphephe khona imakwabo sibe siqhubeka nokuqhulula amahazard ethu ukuze basibone nabanye abasebenzisi bomgwaqo ukuthi sesithe gozololo silalele umhlahlo.
Namuhla ngikhuza umhlola ngikhomba ngeshoba lenkonkoni ngiqojeme ekhaleni layo inqola yomlilo lapho ngithi khuluma makhenikha chitha isiwehle samathambo akho ukhombe ukuthi ukuphi umhlola.
Sekukaningi ngiqaphela ukuthi iningi lomakhenikha liyaqagela uma lihlonza okugulisa imoto, liphinde liqagele okuzolapha kunjalo nje iningi lomakhenikha linamanga liyathanda ukugxekana lodwa.
Umakhenikha akenqeni ukuthi abuze sakuthetha nokukhombisa ukuthi uyayigxeka into eyenziwe emotweni yakho njengokuthi ubani ofase ngocingo indawana ethize emotweni.
Uma umphendula uthi uyena uqobo lona obuzayo, amathe abuyela kwasfuba agcine esekuseka lokho umuzwe esethi kusho ukuthi ngangicabanga ukuthi kwasha kwacima.
Iningi lomakhenikha lifana nezangoma zamanje abalikhiphi igama lokuthi abazi kanti bahlale bekhomba umkhuba lana noma laphaya.
Pho umbona ngani umakhenikha ongazi ukuthi imoto yakho iphethwe yini?
Umakhenikha okuduma upotiyane mayelana nenkinga yemoto yakho umuzwa ngokuthi athi ishiye sizokutshela uma sesiyiqaqile ukuthi umonakalo ungakanani.
Yebo kuyenzeka ukuthi ukujula komonakalo ukubone ngoba usuyiqaqile kodwa phela uze uqala ukuqaqa nje usuke sewazi ukuthi uyaphi.
Umakhenikha ongazi ukuthi konakelephi angayicakaza ayiqede imoto esikhundleni sokuqaqa lokho okonakele kuphela. Umakhenikha kufanele azi ukuthi yini ebulale imoto yakho ukuze uma ikhona indlela ukwazi ukukuvika ngomuso.
Benjalo nje bayaba otsotsi uma ungayazi imoto bangakutshela ukuthi kufe into enkulu okuthatha isikhathi ukuyilungisa besho into encane elungiswa ngesikhathi esincane.
Angithi vele kukhona laba abakutshela ukuthi babiza malini ngehora abalichitha emotweni yakho. Kuyenzeka bakuthengise into kanti ayifile uma sebebona ukuthi uthenge into engadinge kushintshwa bavele bathi bayishintshile kanti bakhuluma amanga.
Kuhle ukucela ukukhonjiswa into ephume emotweni yakho nokuthi ifephi uyithathe ugoduke nayo leyonsimbi ukuze uyazi kahle ngomuso.
Omunye umakhenikha wake wathi kimi ukungazi kuyadula ngoba uma imoto yakho usuyilethe kuyena ngisho kuyinto encane kanjani kufanele akuhlephule ngoba phela wena awazi.
Kanti-ke nabo banakho ukuba ongcweti ngezinto ezithile. Umakhenikha wo carburetor uthole ukuthi ukhanda bona kuphela bese kuba khona okhanda u gearbox kuphela kanti abanye babhekana nenjini kuphela. Yebo kuwo lowomnyama bakhona abakhanda konke imoto eduma ngophethiloli neduma ngodizili.
Mina ngezikhathi zami ngangigxile ekukhandeni injini yeToyota kuphela futhi nakhona ngimandla kuma 1Y, 2Y, 3Y no-4Y.
zinye zazinakho ukungichitha kodwa ngangingabheja ukuthi ngizoyifasa ithule du. Kungalesosikhathi lapho ngafunda khona nokuthi izinhloko zalezizinjini esengizibale ngenhla azilingani nakuba zifana ncamashi.
Lokho ngakubhadama ngama push rods angalingani ngakho uma ungakwazi lokho ungalokhu ufelwa ama camfolo noma kube ugodo oluphatha amathaphethi kanti yingoba ufake inhloko yenye injini kwenye injini wangawashintsha ama push rods.
Uma uya kumakhenikha zama ukumbuza ngokungalwisani naye ukuthi yini angungcweti kuyo emotweni.
Uma usuthole lokho usungakwazi ukubona ukuthi imoto yakho uyishiye ezandleni ezinjani. Noma usukutholile lokho thola nokuthi hlobo luni lwemoto akazishaya isifuba ukuthi uyalulungisa.
Ngaleyo ndlela uzokwazi ukuthi uthathe isinqumo sokumnika ithuba noma udlulele phambili kodwa uqaphele, amanga yinto yabo iningi labo.
Hhayi-ke bantwana bakwethu ngivumeleni ngiqoqe amathambo ami neshoba lami ngisho ukuthi sesingawacisha amahazard ethu siqikelele ukuthi izimoto zethu asizishiyi nje ngaphandle kokuthola ukuthi inkinga ikuphi futhi sibuzisise ukuze singagaxeli enkingeni efanayo ngomuso.
Masiqhubeke nokushayela ngesinono sekati nokubuswa yiyo yonke imithetho yezokushayela ebusa lelizwe ukuze sihlangane sisawuphonsa umbalane nangesonto elizayo kuyo lenkundla.
Uma ufuna siyiqhube lendaba jikijela ukuphawula kwakho ekhasini lethu Igedlela lami with Sthembiso Shangase kuFacebook. Yimi owenu nali ikheli ngezansi hazardiso@gmail.com