Unxenxa amakhasimende awaluleke ngezimoto
MININGI imikhakha eyahlukene ekhona emagaraji adayisa aphinde asevise izimoto ngaphandle kokuba umakhenikha.
UNksz Buyi Twala (37) odabuka eGreen Point, eBergville usithatha asibeke ngomsebenzi wakhe wokunxenxa amakhasimende, nokuwaluleka ngezimoto enkampanini ayisebenzelayo kwaMcCarthy Toyota Kingsmead, eThekwini.
UBuyi uzishaya isifuba ngokwenza umsebenzi othinta uhlobo lwezimoto eziningi nabantu abahlukene.
Uthi waqala ukuleleka abantu esesenkampanini yomshwayelense wabe esedlulela kwaGeneral Motors njengoba esezinze kwaToyota manje.
Uthi lo msebenzi wokululeka abantu ngezimoto ufana nesiphiwo kuyena ngoba ngisho abafunde bagogoda kunaye kulo msebenzi bakhala ngaphansi ngesipiliyoni.
Uveze ukuthi kumele abafisa ukwenza lo msebenzi wakhe bawufundele, babe nezifundo zezibalo ne business studies, bengagcini lapho kodwa bagxile kakhulu kwezokudayisa nokumaketha.
Ukubeke kwacaca ukuthi akasaziboni efuna omunye umsebenzi ngoba umholo walo mkhakha uyanelisa unjalo nje, uhlezi uhambisana nebhonasi njalo ekupheleni kwenyanga uma usebenze ngokuzihlandla.
Lo msebenzi wakhe uwuthathisa okwendlela amakhela izihlobo nabangani ngoba umxhumanisa nabantu abagcina esenobudlelwane nabo.
Uthi indlela asebenza ngayo nabantu abahlukahlukene sekumenze wagcina enothando lwabantu noma engasasebenzi.
Ukhale ngengcindezi yokuphunga amakhamende ashelayo uma ewamukela ngothando ukuze azizwe amukelekile uma ezethenga imoto.
“Yazi lo msebenzi udinga ube nesineke, uthande amakhasimende ukuze azizwe amukelekile.
“Manje inkinga iqala uma engishela bese ngifuna amaqhinga amaningi okugwema lesi sesheli ngesineke nangenhlonipho. Amanye acabanga ukuthi usuke ungasadayisi imoto kodwa usuzidayisa wena uqobo kanti cha akunjalo,” kubeka uBuyi.
Le ntokazi ithi isineminyaka engaphezulu kweyisikhombisa yeluleka ngezimoto kodwa nayo isenenkinga yokuthanda izimoto ezahlukene nezisestayeleni.
Ithi iyona yeluleka futhi ifundisa amakhasimende ngobuchwepheshe bezimoto ezikhona egaraji labo njengoba bengadayisi ezakwaToyota kuphela, kukhona nezinye zezinkampani ezingamasekeni abazidayisayo.
Uphethe ngokuthi lo msebenzi ufisa abantu bawuthande futhi bawamukele ngoba wonke umuntu emhlabeni uyafisa ukuba nemoto manje kwenza uhlale umatasa futhi uzakhela nemali ephindiwe ngokuxhumana nabantu abathanda izimoto.
Lo msebenzi kaBuyi awusebenzisani ngamaholidi futhi uyanikana isikhathi sokuphumula ngezimpelasonto.