Ube nesasasa umdlalo wezimoto
BEKUBUBULA inqawe futhi kunuka insizi yethayi eMatikwe, eNanda lapho bekunomdlalo khona wezimoto muva nje.
Amaqembu abenandisa ngokuklwebha ithayi nokudlala ngenqawe.
Lawa maqembu bekungelamaVW City Golf, iNanda Rox nelamaGusheshe elihamba ngezimoto zakwaBMW.
Ayikho efune ukugoba uphondo njengoba zonke ebezingena eshashalazini bezishiya ababukeli befuna impinda.
Lawa maqembu aqhudelana minyaka yonke ngenyanga yentsha khona eMatikwe ukuze abathandi bobumnandi bezimoto bezoziqasha uma benza imicimbi ukuzobanandisela ngenqawe nangethayi.
Sekukuningi okwenziwa ilama qembu ngoba kungekhona ukuklwebha ithayi kuphela kodwa abuye axhase nasemphakathini waseNanda, ahambele izindawo ezihlala abantu abadala nezintandane abuye alwisane nobugebengu.
Nangonyaka ozayo lawa maqembu athembise ukushaya ibuya endaweni efanayo.
Kunxuswe bonke abathanda ukungenala lo mdlalo ukuthi abeze nezimoto zabo amaVW City Golf uma bethanda iqembu le iNanda Roxy noma namaGusheshe uma bethanda elamaGusheshe.
Kumele izimoto zabo zibe sesimweni esiwulungele umgwaqo, nabashayeli bazo babe nezincwadi zokushayela, mase beyaqeqeshwa benikezwe nemigomo yeqembu abathanda ukuwajoyina.
Okuyingozi ngalo mdlalo wabo wokunandisa ngemoto ukuthi awunawo umshwalense, futhi wenza nemoto yakho yehlelwe inani lemali ongayidayisa ngalo uma ungasayidingi.
Okuthandwa abadlali bazo ukuthi benza ubungani bebodwa abahamba ngezimoto ezifanayo, balungisa imoto ngokubambisana uma kukhona ilunga le qembu lalo elilinyalelwe imoto, benza izinga lokwebiwa kwezimoto zabo lehle ngoba bayazana nokwenza kube lula ukuthi bayibone imoto yozakwabo uma ishayelwa umuntu abangamazi.