Zizowushaya maduze kuMinnie
KUVELA ukuthi bazoshada ngoSepthemba uMinenhle “Minnie” Dlamini nesithandwa sakhe uQuinton Jones, njengoba bekunomcimbi wokwembeswa kwale ntokazi ngoMgqibelo, eThekwini.
Imithombo esondelene noMinnie, ithe konke sekumi ngomumo sekushoda kuphume izimemo zomshado.
“Nami noma ngingakaqinisekisi kahle kodwa umshado ukhonjwa ngoSepthemba. Ujabule kakhulu uMinnie ngendlela uQuinton agcine ngayo usiko futhi wenza zonke izinto ngendlela,” kusho umthombo ongeke udalulwe.
NgoMgqibelo kubukeke kugoqwa konke njengoba abakwaJones behambe sebewuphethe umabo wabo uphuma kwabakwaDlamini.
Kucace bha ukuthi kushoda umshado omhlophe njengoba noyise kaMinnie, uMnuz Jabulani Dlamini echazele izihambi ukuthi ezinye izinto zenziwa ngesikhathi kulotsholwa.
Kulo mcimbi unina kaMinnie, uNkk Queen Dlamini, ebizwa umndeni wakwaJones uzomnika okungokwakhe, kucace bha ukuthi kuningi njengoba bemuphe amabhokisi amathathu amakhulu.
Kulawo mabhokisi bekukhona izingubo ezimbili zohlobo oluphambili zihambisana namaphinifa akhona namaduku.
Uphinde wanikezwa isitofu segesi ebesihambisana namabhodwe akwaLe Creuset.
Izifiso zikaMinnie zokuthi izithombe zakhe zingabonwa umphakathi azifezekanga njengoba zigcine ziputshukile.
Kulo mcimbi beziqinile ezokuphepha njengoba bekukhona onogada abebenkanisile begade abantu abasebenzisa amaselula
Kodwa kucace bha ukuthi nabo bagcine behlulekile njengoba izithombe zigcine ziputshukile.
UMinnie kulo mcimbi ubegqoke ingubo emhlophe enendwangu eyigolide ebihamba iwumsweswana kuyo.
Ubethwele isicholo esikhulu esimhlophe ngaphansi kuvela izinwele.
Umyeni wakhe ubegqoke isudi emnyama wagaxa ubuhlalu obude obebuyihlobisile.
Kwabebekhona kubalwa usomabhizinisi uBasetsana Kumalo nodadewabo uJohanna Mukoki, unkosikazi kaMnuz Bheki Cele uThembeka, ehambisana nomngani wakhe uNkk Noma Gigaba, Unathi Msengana, Criselda Dudumashe, Dudu Khoza, Jessica Nkosi, Khaya Mthethwa, Zakes Bantwini, Nandi, Andile Ncube, Anele Mdoda nabanye.